Қырғызстан Бас прокуратурасы "Ата Мекен" партиясының түрмеде отырған лидері Омурбек Текебаевтың ісін қайта қарап жатыр. Бұл жайында оның адвокаты Таалайгүл Токтакунова мәлімдеді.
Осының алдында бас прокурор Откурбек Жамшитов Текебаев ісін оның қорғаушыларының өтініші бойынша қайта қарауды тапсырғанын мәлімдеген. Текебаевтың адвокаттары іске байланысты Леонид Маевский мен Алексей Модиннің жалған куәлік бергенін анықтағанын айтқан.
21 мамырда "Ата Мекен", "Онугуу-Прогресс" және "Республика-Ата Журт" партиялары Омурбек Текебаевтың ісін қайта қарау керектігін мәлімдеген.
"Ата Мекен" партиясының лидері Омурбек Текебаев пен Қырғызстанның Оңтүстік Кореядағы елшісі болған Дуйшенкул Чотонов 2017 жылдың ақпан айында ұсталған. Олар 2010 жылы ресейлік кәсіпкер Леонид Маевскийден "Мегаком" компаниясының акциясына иелік етуіне көмектесу үшін 1 миллион доллар пара алған деп айыпталған.
Қырғызстан Жоғарғы соты 2017 жылы 21 қарашада екі саясаткерді 8 сегіз жылға соттаған аудандық соттың үкімін сол күшінде қалдырды.
Сотталушылар өздеріне тағылған айыптың саяси астары бар деп санайды.
ПІКІРЛЕР