Accessibility links

Түркияда алты журналисті ұзақ мерзімге соттады


Мемлекеттік төңкеріс әрекетіне қатысы бар деген айыппен жауапқа тартылып жатқан адамдарға қолдау білдіріп сот ғимараты алдында тұрған наразылар. Анкара, тамыз, 2017 жыл. (Көрнекі сурет.)

Стамбул соты терроризммен байланысты бірқатар айыптар тағылған Zaman газетінің алты журналисін кінәлі деп танып, ұзақ мерзімге түрме жазасын тағайындаған.

Колумнист Мумтазер Түркен мен басылымның Анкарадағы редакциясының жетекшісі Мұстафа Оналға 2016 жылы мемлекеттік төңкеріс әрекеті іске аспай қалған соң қозғалған іс бойынша 10 жылдан артық уақыт түрме жазасы берілген.

Сот журналист Ибрагим Карайегенді тоғыз жылға, колумнистер Әли Булач, Сахин Алпай және Ахмет Туран Алканның әрбірін – сегіз жылға бас еркіндігінен айырған.


Журналистердің барлығы Түркияда осыдан екі жыл бұрын мемлекеттік төңкеріс жасамақ болғандардың әрекеті іске аспай қалған соң тұтқындалған. Оларға "террорлық ұйымға мүше болу", "Түркия Конституциясын бұзу" және өзге де айыптар тағылған. Жұмысы тоқтатылған Zaman басылымында істеген тағы бес журналист ақталған.

Zaman газетімен байланысы бар деп саналатын, қазір АҚШ-та тұратын түрік діни қайраткері Фетхулла Гүленді ресми Анкара 2016 жылғы шілдеде Түркияда іске аспай қалған мемлекеттік төңкеріс әрекетін ұйымдастырушы деп айыптайды. Гүлен бұл айыптауды жоққа шығарады.

2016 жылы қыркүйекте 30 журналист пен газет жетекшілеріне қарсы сот басталған. Олардың барлығы өздеріне "Түркия президенті Режеп Ердоғанды биліктен тайдырма болды" деп тағылған айыптарды жоқа шығарған.

Түркияда мемлекеттік төңкеріс әрекетінен кейін Гүленмен байланысы бар деген күдікпен ондаған мың адам: әскерилер, шенеуніктер, мұғалімдер, журналистер және өзгелер ұсталып, қамалған. Тағы ондаған мың адам ауқымды тазартулар барысында жұмыстан қуылған немесе шеттетілген. Жергілікті құқық қорғаушылардың мәліметінше, елде ондаған БАҚ және коммерциялық емес ұйымдар жұмыстарын тоқтатқан.

ПІКІРЛЕР

XS
SM
MD
LG