Accessibility links

Сайрагүл Сауытбай процессуалдық келісім жасасуды өтінді


Сайрагүл Сауытбай, Қытай қазағы. Жаркент, 9 шілде 2018 жыл.

Қытай қазағы, Қазақстанға заңсыз кірді деп айып тағылған Сайрагүл Сауытбай Алматы облысының Жаркент қаласында өтіп жатқан сотта қылмысын мойындап, прокурормен процессуалдық келісім жасауды өтінді деп хабарлайды Азаттық тілшісі.

Бүгінгі соттың түске дейінгі бөлігінде прокурор Арзыгүл Имярова Сайрагүл Сауытбайға ресми айыптау актісін оқыған. Прокурордың сөзінше, Сайрагүл Сауытбай Қазақстан Қылмыстық кодексінің 392 - бабы ("шекараны заңсыз бұзып өту") бойынша айыпты деп танылған. Қазақстан заңы бойынша, ол айыпты деп танылса елден шығарылады.

Сот тергеуі кезінде Сайрагүл Сауытбай өзіне тағылған айыпты толық мойындайтынын айтқан. Ол өзіне Қытайда "саяси қысым жасалғандықтан шекарадан заңсыз өтуден өзге жол қалмағанын" мәлімдеген. Сауытбайдың сөзінше, ол Қытайда құпия саналатын "саяси үйрену орталықтарында" жұмыс істеген, "мемлекет құпиясын әшкерелемеу" туралы қолхат берген.

Судья Динара Құйқабаева Сайрагүл Сауытбайдың өтініше байланысты сот отырысын шілденің 23-іне қалдырды.

Бүгінгі сотқа Алматыдағы Қытай консулдығының өкілдері де келді. Консулдық өкілдері соттан кейін журналистер мен белсенділердің сауалдарына жауап берместен кетіп қалды.

Қытай консулдығының өкілдері мінген көлік соттан кетіп барады. Жаркент, 13 шілде 2018 жыл.
Қытай консулдығының өкілдері мінген көлік соттан кетіп барады. Жаркент, 13 шілде 2018 жыл.

Мамырдың ортасында Алматы облысының тұрғыны Уәли Сіләм әйелі Сайрагүл Сауытбайды Қазақстан Ұлттық қауіпсіздік комитетінің қызметкерлері Қорғас кеден бекетін заңсыз бұзып өтті деген айыппен ұстап алып кеткенін хабарлаған.

  • 16x9 Image

    Асылхан МАМАШҰЛЫ

    1973 жылы 22 сәуірде дүниеге келген. 1994 жылы Қорқыт ата атындағы Қызылорда пединститутын бітірген. 1997-2000 жылдары әл-Фараби атындағы Қазақ ұлттық университетінің аспирантурасында оқыған. "Қазақ энциклопедиясы" баспасында (2001-2007), республикалық "Ана тілі" газетінде (2007-2009) , "ABDI-press" орталығында (2009-2010) жұмыс істеген. 2011 жылдан Азаттық радиосының тілшісі.

    Тарихи, саяси мәселелер тақырыбында жазады, белгілі тұлғалардың саяси портреттерін жасайды. Автормен оның Facebook парақшасында да пікірлесуіңізге болады.

ПІКІРЛЕР

XS
SM
MD
LG