Accessibility links

Ақтөбеде "тыйым салынған ұйым мүшелері" сотталды


Ақтөбедегі сот ғимаратының алды

25 шілде күні Ақтөбе қалалық сотының Қазақстанда тыйым салынған «Таблиғи жамағат» ұйымының жеті мүшесіне қатысты үкімі күшіне енді. Бұл туралы Ақтөбе облыстық сотының баспасөз қызметі хабарлады.

Тергеу материалдарына қарағанда, сотталушылар бұл діни ұйымға 2000 жылдан бастап мүше болған. "Осы бағытта уағыз тыңдап, білімдерін жетілдіру үшін Үндістан мен Пәкістанға барып келген. Соңғы кездері уағыз-насихатты облыс тұрғындары арасында белсенді түрде жүргізе бастаған. Яғни, арнайы топ құрып, үй аралап, уағыз айтқан".

«Таблиғи жамағат» халықаралық ұйымын Қазақстан соты экстремистік деп танығаннан кейін оның қызметіне ел аумағында тыйым салынған. "Сотталушылар сол туралы біле тұра «Таблиғи жамағат» идеологиясын таратумен айналысқан" деп хабарлайды облыстық сот.

Соттың мәліметінше, «Таблиғи жамағат» ұйымына мүше болған жеті ақтөбелікті ҚР ҰҚК өкілдері 2018 жылғы мамыр айында қамауға алған. Олардың үстінен ҚР ҚК 405 бабы бойынша (“Экстремистік ұйымның әрекетіне қатысу”) іс қозғалған.

Сотталушылардың бесеуі - Ақтөбе тұрғындары, екеуі - Хромтау ауданынан. Барлығы да көпбалалы, әйелдері жұмыссыз, өздері бұрын-соңды сотталмаған. Осыны және айыпталушылардың тергеуге көмектескенін ескеріп, сот олардың бас бостандығын бір-үш жыл аралығында шектеді.


  • 16x9 Image

    Жаңагүл ЖҮРСІН

    Жаңагүл Жүрсін - Азаттықтың Ақтөбе облысындағы тілшісі. Қ.Жұбанов атындағы Ақтөбе университетін бітірген. Еңбек жолын Ақтөбе облыстық телевидениесінен бастап, әр жылдары осы өңірдегі түрлі БАҚ-та тілші, редактор, бас редактор қызметін атқарған. Азаттықпен 2011 жылдан бері әріптес.

ПІКІРЛЕР

XS
SM
MD
LG