Accessibility links

Балалары грантқа түспей қалған ата-аналар наразылық танытты


Балалары грантқа ілінбей қалған ата-аналар Туризм және спорт академиясының алдында жиналып тұр. Алматы, 13 тамыз 2018 жыл.

Тамыздың 13-і күні Алматыдағы Туризм жəне спорт академиясының алдында ондаған ата-ана жиналды. Азаттық тілшісінің хабарлауынша, олар балаларының спорттағы жетістіктеріне қарамастан грантқа ілінбей қалғандарына наразы.

- Менің балам осы академияға тапсырған, 113 балл жинаған. Соның өзінде түспей қалды. Ол 3-сыныптан бастап еркін күреспен айналысады, 7-сыныпта республикалық спорт колледжіне оқуға түсті. Соны аяқтап академияға келіп едік, түспей қалды. Естуімізше, спортта еш жетістігі жоқтардың өзі оқуға түскен. Балаға обал ғой, - дейді наразы ата-аналардың бірі Гүлнар Мұратбекова

Алматы облысынан келген талапкер Үкілай Ахмет бес жылдан бері джиу-джитсумен айналысады.

- Төрт рет Қазақстан чемпионы болдым және Азия чемпионы атандым. ҰБТ-дан екі пән бойынша 34 балл алдым және шығармашылық емтиханнан - 80 балл, сонда барлығы 114 балл болып тұр. Ал кей талапкерлер грантқа 115 баллмен түсіпті, - дейді грантқа ілінбей қалған Үкілай Ахмет.

Ата-аналар академиядағы ақылы оқудың бір жылдық бағасы 500 мың теңге екенін айтады. Жоғарғы оқу орны басшылығы оның жыл сайын өзгеруі мүмкін екенін де ескерткен.

Жиналғандар алдына шыққан Туризм жəне спорт академиясының проректоры Мұхтар Есқалиев осындай наразылық боларын сезгендерін айтады.

- Биылғы жылға дейін жоғарғы дәрежедегі спортшыларымыз, соңғы үш жылдағы халықаралық және республикалық жарыстардың жеңімпаздары мен жүлдегерлері басымдыққа ие болатын. Негізгі конкурс осылардың арасында болатын да, спортқа қатысы бар жасөспірімдер оқуға түсетін. Биыл сол заңға өзгеріс енді де, жетістікке тек балы тең түскен жағдайда ғана басымдық берілетін болды. 2018 жылдың шілде айында "Білім туралы" заңның 26-бабы 5-тармағына тиісті өзгеріс енді. Яғни, енді жалпы білім беретін мектептердің түлектері, кім жоғарғы балл жинаса сол оқуға түсіп тұр, - дейді Мұхтар Есқалиев.

Проректордың сөзінше, биыл республикада спортшыларды 42 жоғарғы оқу орны дайындайды, оларға жалпы 450 грант бөлінген.

  • 16x9 Image

    Мәншүк АСАУТАЙ

    1980 жылы туған. Е.Бөкетов атындағы Қарағанды мемлекеттік университетін бітірген.

    Қарағанды қаласындағы жергілікті телеарнада қызмет еткен. 2004 жылдан бері Азаттықтың тілшісі. 

    Автормен оның Facebook парақшасында да пікірлесуге болады.

ПІКІРЛЕР

XS
SM
MD
LG