Accessibility links

Макс Боқаевтың Ақтөбеге этаппен жөнелтілгені хабарланды


Макс Боқаев, азаматтық белсенді. Қазан 2016 жыл.
Макс Боқаев, азаматтық белсенді. Қазан 2016 жыл.

Азаматтық белсенді Вадим Курамшиннің сөзінше, сотталған атыраулық белсенді Макс Боқаев 26 тамызда Петропавлдағы түрмеден Ақтөбедегі жалпы режимдегі колонияға этаппен жөнелтілген. Бұл ақпаратты Азаттыққа Солтүстік Қазақстан облысы қылмыстық атқару жүйесі департаменті растады. Департамент ақпаратына қарағанда, Макс Боқаевтың туыстарына оның басқа колонияға ауыстырылғаны туралы хабарлама жіберілген.

Ақтөбедегі жалпы режимдегі колонияда Азаттыққа тұтқын 28 тамыз күні этаппен келгендер арасында Макс Боқаевтың болмағанын, ал келесі этап енді 10 қыркүйектен кейін ғана келетінін мәлімдеді.

Вадим Курамшиннің ақпараты бойынша, 45 жастағы Макс Боқаев қазір Қарағандының тергеу абақтысындағы айдауға жөнелтілетін пункте отыр. Алайда, Қарағандыдағы тергеу абақтысындағылар бұған қатысты қандай да бір ақпарат беруден бас тартты.

Макс Боқаевтың қарындасы Жанаргүл Боқаева Азаттыққа туыстарына ағасының Петропавлдан Ақтөбеге ауыстырылғаны туралы хабарлама келмегенін айтты. Ол 76 жастағы анасы Рахила Қожасовамен бірге 22-24 тамыз аралығында Макс Боқаевпен ұзақ уақыт кездесуде болған.

Жанаргүл Боқаева ағасының денсаулығы бірқалыпты екенін айтады. Бірнеше апта бұрын түрме әкімшілігі Боқаевқа "екінші дәрежелі теріс мінез-құлық көрсетті" деген баға берген. Қарындасының сөзінше, бұған Макс Боқаевтың түрмедегі тексеру кезінде бас киімін шешпей қоюы себеп болған. Жанаргүл Боқаева анасы екеуі Макс Боқаевты Ақтөбеге ауыстыру туралы түрме әкімшілігімен, я ағасымен сөйлеспегенін айтады.

Макс Боқаевқа бұған дейін де "үшінші дәрежелі теріс мінез құлық көрсетті" деген баға берілген. Ол биылғы қаңтарда 2017 жылғы желтоқсан айында түрмеде 25 градус суықта таңғы дене шынықтыруды жасаудан бас тартқаны үшін алты рет жазаға тартылып, тәртіптік оқшаулау камерасына қамалған.

Макс Боқаев 2016 жылғы Атыраудағы аса ауқымды жер реформасына қатысты митингілерден соң бес жылға сотталған. 2016 жылғы 28 қарашада Атырау қалалық №2 соты Боқаевтың жазасын Атыраудағы УГ 157\9 мекемесінде өтеуді белгілегенімен, 2017 жылғы 27 қаңтарда Солтүстік Қазақстан облысындағы ЕС -164\3 мекемесіне жөнелтілген. Содан бері Макс Боқаев та, оның туыстары да бұл ауыстырумен келіспей, бірнеше мәрте арызданған, алайда сот бұл арыздарды қанағаттандырмаған.

  • 16x9 Image

    Қазис ТОҒЫЗБАЕВ

    Қазис Тоғызбаев 2008 жылғы қыркүйектен бастап өмірінің соңына, яғни 2021 жылғы 28 ақпанға дейін Азаттықтың Алматыдағы тілшісі ретінде еңбек етті. Азаттыққа дейін оппозициялық "Сөз" және "Азат" газеттерінде, kub.info сайтында тілші болған.

ПІКІРЛЕР

XS
SM
MD
LG