Accessibility links

Алматы кинофестивалінің бас жүлдесін "Хрусталь" фильмі алды


"Хрусталь" фильмінің продюсері Валерий Дмитроченко (сол жақта) және қазылар алқасының төрағасы Сергей Бодров. Алматы, 19 қыркүйек, 2018 жыл.
"Хрусталь" фильмінің продюсері Валерий Дмитроченко (сол жақта) және қазылар алқасының төрағасы Сергей Бодров. Алматы, 19 қыркүйек, 2018 жыл.

Биыл алғаш рет ұйымдастырылған Халықаралық Алматы кинофестивалінің бас жүлдесін Беларусь, Ресей, Германия мен АҚШ кинематографистерінің "Хрусталь" фильмі жеңіп алды. Картинада Веля есімді Минск тұрғынының өмірі баяндалған.

Қыркүйектің 19-ы күні бас жүлдені фильмнің Минскіден келген продюсерлерінің бірі Валерий Дмитроченкоға кино байқауына ұсынылған көркем шығармаларға баға берген халықаралық жюри жетекшісі ресейлік кинорежиссер әрі сценарист Сергей Бодров табыс етті.

Бұл жүлде - "Хрусталь" фильмінің алғашқы марапаты емес. Биыл шілдеде ол Одессадағы "Золотой Дюк" халықаралық кинофестивалінің бас жүлдесін жеңіп алған.

Алматы кинофестивалінің "Мәдениеттің жақындасуы" деп аталатын негізгі байқауына он картина қатысты. Олардың әрбірі екі немесе одан көп елдің бірлесіп түсірген туындылары. Бұл бағдарламада Қазақстанмен бірге Грузия, Швеция, Тайвань, Жапония, Үндістан, АҚШ, Украина, Германия, Палестина, Голландия, Мексика, Исландия, Бельгия, Боливия, Уругвай, Беларусь, Ресей, Катар мен Франция кино шеберлерінің шығармалары көрсетілді. Соның бірі – қазақстандық режиссер Әділхан Ержановтың "Әлемнің мейірімді бейжайлығы" ("Ласковое безразличие мира") атты фильмі қазылар алқасының арнайы жүлдесіне ие болды.


Бірінші Халықаралық Алматы кинофестивалі қыркүйектің 15-19 күндері өтті. Қала әкімдігі ұйымдастырған байқаудың алғашқы күні режиссер Сергей Дворцевойдың "Айка" фильмі көрсетілді. Бұл фильмде бас кейіпкерді сомдаған қазақстандық актриса Самал Еслямова биыл мамырда Канн кинофестивалінде "Үздік әйел рөлі" номинациясының жеңімпазы атанған. Алматыда бұл фильмнің толық нұсқасы алғаш рет көрсетілді.

Бес күнге жалғасқан фестиваль барысында байқаудың негізгі бөлігіне қоса конкурстан тыс көрсетілетін картиналар қойылып, шеберлік кластары өтті.

ПІКІРЛЕР

XS
SM
MD
LG