Түркіменстан президенті Гурбангулы Бердімұхамедов Душанбеде 27-28 қыркүйекте өтетін (Тәуелсіз мемлекеттер достастығы) ТМД басшыларының саммитіне қатыспайды. "Бейтарап Түркіменстан" ресми газетінің жазуынша, саммитке елдің вице-премьері барады.
Түркімен президенті 29 қыркүйек пен 2 қазан аралығында Нью-Йоркте өтетін БҰҰ Бас ассамблеясының 73-сессиясына қатысу үшін АҚШ-қа аттанады.
ТМД төрағалығы бұл жолы Тәжікстаннан Түркіменстанға өтеді. Тәжікстан президенті Эмомали Рахмон өзі төрағалық еткен жылдарға есеп беріп, басқару тізгінін енді бейресми түрде Түркіменстан үкіметіне тапсырады. Ашхабад билігі ТМД-ның даму тұжырымдамасын жариялауы тиіс.
Саммитке ТМД елдері - Армения, Әзербайжан, Беларусь, Қазақстан, Қырғызстан, Молдова, Ресей және Өзбекстан президенттері қатысады деп жоспарланған.
Әзірге ресми Киев Украина басшысының саммитке қатысатыны, я қатыспайтыны туралы жауап бермеді. Украина ТМД құрамынан шығатыны туралы мәлімдегенімен, әлі заңды түрде ТМД мүшесі.
ПІКІРЛЕР