Accessibility links

Сыныптасына жұмыртқа лақтырған оқушылардың ата-аналары жауапқа тартылмақ


Эльмира Қасанова, Ақтау қалалық ювеналдық полиция бөлімшесінің аға полицейі. Ақтау, 11 қазан 2018 жыл.

Ақтаудағы №8 орта мектептің 8-сынып оқушылары сыныптасын жұмыртқа лақтырып "құттықтағаны" үшін олардың ата-аналары жауап береді. Бұл туралы қазанның 11-і күні Ақтау қалалық білім бөлімінің басшылығы хабарлады.

Өткен аптада әлеуметтік желіде Ақтаудағы мектептердің бірінде бағанға скотчпен байланған жасөсіпірімге құрбылары жұмыртқа лақтырып жатқаны туралы видео тараған. Видеода бала жылап тұрған.

№8 мектеп директоры Әселхан Есжанованың айтуынша, бұл - соңғы кезде жасөсіпірімдердің арасында тарап кеткен "туған күнде бір-біріне осындай тосын сый жасау дәстүрі".

- Бала мектепке сол күні спорттық киіммен келген. Ол 14 жасқа толғандықтан оны скотчпен он төрт мәрте орап, оған жұмыртқа лақтырған. Жұмыртқа басына қатты тигендіктен ол жылаған, - дейді мектеп директоры.

Бұл жағдайды басқаша бағалаған Ақтау қалалық ювеналдық полиция бөлімшесінің аға полицейі Эльмира Қасанова бір-бірімен әзілдескен жасөсіпірмдердің ата-аналары Әкімшілік құқық бұзушылық кодексінің 127-бабына сәйкес "өз міндетін дұрыс атқармағаны" үшін жауапқа тартылатынын мәлімдеді.

- Ешкім шағымданған жоқ. Құқық бұзушылық жоқ. Бірақ балалар құқығын қорғау комиссиясы қараған соң іс сотқа жолданады. 15 айлық есептік көрсеткішке тең (36 мың теңге) айыппұл салынуы мүмкін, - деді ол.

Ақтау қалалық білім бөлімінің бастығы Светлана Төлебаеваның айтуынша, жасөспірімдер арасындағы мұндай әзілдер Еуропадан тарап жатыр.

- Ата-аналары бұл балалардың өзара ойындары екенін айтады. Бірақ балалар әзілдегенде де абай болуы тиіс. Олар мектепішілік есепке алынды. Бірақ ешқандай арызданып отырған жоқ, - деді Төлебаева.

Жасөспірімдер әзіліне комментарий беруге келгендердің ешқайсысы Азаттық тілшісінің "Құқық бұзушылық болмаса не үшін балалар мен олардың ата-аналары жазалануы тиіс?" деген сауалына нақты жауап бермеді.

"Әлеуметтік желіде тараған соң реакция білдіруіміз керек" деді қалалық білім бөлімінің бастығы.

  • 16x9 Image

    Сәния ТОЙКЕН

    Сәния Тойкен Азаттық радиосында 2007 жылдан бері жұмыс істейді. ҚазҰУ-дің журналистика факультетін бітірген. Республикалық  "Қазақстан пионері", "Жас Алаш" газеттерінде тілші болған. Қазақстан Республикасы Жекешелендіру жөніндегі комитетінің баспасөз хатшысы қызметін атқарған. Атырау облыстық "Ақ Жайық" газетінде  тілші, қазақ редакциясының редакторы, Маңғыстау облысында шығатын "Не хабар?!" апталығының редакторы болып жұмыс істеген. 

    Сәния Тойкен 2017 жылы журналист әйелдердің халықаралық қоры (IWMF) тағайындаған "Журналистикадағы батылдығы үшін" сыйлығын иеленді. Ол - бұл беделді сыйлықты алған алғашқы қазақстандық журналист.

ПІКІРЛЕР

XS
SM
MD
LG