Accessibility links

АҚШ-та жарылғыш қораптарға қатысы бар күдікті ұсталды


ФБР және пошта қызметкерлері күдіктінің көлігін алып кету жағын ойластырып жатыр. Флорида штаты, 26 қазан 2018 жыл
ФБР және пошта қызметкерлері күдіктінің көлігін алып кету жағын ойластырып жатыр. Флорида штаты, 26 қазан 2018 жыл

АҚШ-та Дональд Трамптың оппоненттеріне жолданған жарылғыш қораптарға қатысы бар деген күдікпен бір азамат ұсталды. Күдіктінің аты-жөні Цезарь Сайок, Флорида штатының 56 жастағы тұрғыны. NBC дерегінше, ұсталған азамат бұрын сотталған.

26 қазанда Флорида штатында полиция сенатор-демократ Кори Букерге бағытталған күдікті қорап тапқан. ФБР бұл деректі растаған.

Тағы бір осыған ұқсас қорап 26 қазанда таңертең Нью-Йорктегі пошта жәшігінде табылған. Расталмаған дерек бойынша, қорап CNN телеарнасындағы Джеймс Клэпперге бағытталған. Клэппер бұрын ұлттық барлау қызметін басқарған.

Бомба салынған қорап бұған дейін АҚШ-тың бұрынғы президенттері Билл Клинтонның үйіне және Барак Обаманың кеңсесіне, CNN телеарнасына және миллиардер Джордж Соросқа, актер Роберт де Нироға жіберілген. ФБР-дың айтуынша, күдіктіні саусағының таңбасы арқылы тапқан.

Қораптардың барлығы күдікті тұрған Флорида штатындағы бір пошта орталығы арқылы жіберілген. Сайокқа қазіргі кезде бес айып тағылып отыр: Штаттар арасында бомба жіберу, жарылғыш хаттарды заңсыз жіберу, АҚШ-тың бұрынғы президенттері мен өзге азаматтарға қоқан-лоқы жасау, штаттар арасында байланыстың үзілуіне қауіп төндіру, федералдық қызметкерлерге шабуыл жасау.

ПІКІРЛЕР

XS
SM
MD
LG