Accessibility links

Министр дизель бағасын төмендетуді ұсынды


Петропавлдағы жанармай станцияларының біріндегі дизель литрінің бағасы. 9 қазан 2018 жыл (Көрнекі сурет).

Қазақстан энергетика министрі Қанат Бозымбаев ішкі нарыққа шығарылатын дизель бағасын түсіруді ұсынды. Астанада өткен брифингте министр елдегі жанар-жағармай сататын компаниялар мен жанармай бекеттері бағаны түсіруі керегін айтты. Оның сөзінше, 1 қарашадан бастап дизель акцизі төмендетілген.

"Түсінеміз, қазір бағаны нарық белгілейді. Дизель бағасын мемлекет қоймайды. Дегенмен, сіздердің істеріңізге қалай болғанда да килігеміз. Себебі, егер біз араласпасақ, онда келешекте сіздерде де проблема туындауы мүмкін" деді министр.

Жанар-жағармайды көтерме бағаамен сататын компания өкілдері бағаны түсіру жөнінде "ойланып көретіндерін" айтты.

Бозымбаев сонымен қатар Ресеймен шектесетін облыстарда жанармайды тұтыну мөлшері күрт артқанын, мұның себебі Ресейде жанармай бағасының қымбаттауында екенін айтты. Оның сөзінше, Ресейде жанармай бағасы қымбаттағандықтан солтүстік облыстарда қазақстандық бензин мен дизельді Ресейге тасып әкету жиілеген.

Министр бұл мәселені ретке келтіру үшін шекарада бақылауды күшейту керегін, алда үкіметке ішкі нарықты қорғауға қатысты ұсыныс жасайтынын жеткізді.

Қанат Бозымбаев бұған дейін газ бен электр қуаты бағасы арзандайтынын айтқан.

Қазақстанда тарифтерді төмендету шаралары жуырда президент Нұрсұлтан Назарбаев қатысқан өткен Қауіпсіздік Кеңесі отырысынан кейін қолға алынды.

  • 16x9 Image

    Өркен ЖОЯМЕРГЕН

    Өркен Жоямерген 2006 жылы әл-Фараби атындағы Қазақ ұлттық университеті журналистика факультетінің бакалаврын, 2008 жылы магистратурасын тәмамдаған. Қызмет жолын "Алматы Ақшамы" газетінен бастаған. Алматы және Астана қалаларындағы бірқатар бұқаралық ақпарат құралдарында жұмыс істеген. Қазір Азаттық Радиосы Астана бюросының жетекшісі. 

    Автормен оның Facebook парақшасында да пікірлесуіңізге болады.

ПІКІРЛЕР

XS
SM
MD
LG