Facebook компаниясы былтыр PR агенттігіне өзін сынайтындардың беделін түсіруге тапсырыс берген. Бұл туралы New York Times газеті ондаған дереккөзі - компанияның қазіргі және бұрынғы қызметкерлері, билік өкілдері мен сарапшыларға сілтеме жасап хабарлады.
Тапсырысты орындағандар Facebook-ты сынағандарды миллиардер Джордж Сороспен байланысы бар деп атап, олардың "Facebook-тен азат болу" және "Өзгерістер түсі" деп аталатын жобаларды қаржыландыратынына назар аударуға шақырған.
Басылым әлеуметтік желі әкімшілігі осылайша қоғам назарын өз қауіпсіздігі мәселелерінен бұрып әкетуге талпынғанын айтады.
Facebook былтыр Cambridge Analytica компаниясы 50 миллион қолданушының мәліметін саяси жарнама жасауға жинағаны әшкереленген соң қатаң сынға ұшыраған. Facebook-тің негізін салушы Марк Цукерберг мәліметтер базасының бұзылғанына және саяси кампания кезінде әлеуметтік желінің "жалған хабар" таратып, жеккөрушілікті тудыруда пайдаланылғанына кінәлі екенін мойындаған.
ПІКІРЛЕР