Accessibility links

Астана Ресей мен Украинаны шиеленіске жол бермеуге шақырды


Сыртқы істер министрлігінің баспасөз хатшысы Айбек Смадияров брифинг өткізіп отыр. Астана, 26 қараша 2018 жыл.

Қазақстан Сыртқы істер министрлігінің баспасөз хатшысы Айбек Смадияров Азов теңізіндегі жағдайға байланысты Ресей мен Украинаны шиеленіске жол бермеуге шақырды.

Астанада өткен брифингте Смадияров Қазақстан "жағдайды бақылап отырғанын" және "теңгермелі саясат ұстанатынын" айтты. "Тараптарды барынша жауапты болуға және шиеленісті ушықтырмауға шақырамыз. Сенімді қайта дұрыстау керек. Мұндай оқиғаларды болдырмау және реттеу механизмдерін дайындау қажет деп есептейміз. Қазақстан шиеленісті бәсеңсіту жолындағы барлық шараны қолдайды" деді Смадияров.

25 қарашада Ресей Қара теңізден Азов теңізіне өтетін жалғыз жол - Керчь бұғазында Украина әскери-теңіз күштерінің үш кемесін оқ атып, ұстаған. Ресей Федералдық қауіпсіздік қызметі украиналық әскери кемелер "Ресей шекарасын бұзғанын", Қара теңізде оларды ұстау үшін қару қолданылғанын және үш теңізшінің жараланғанын растаған. Украина Ұлттық қауіпсіздік және қорғаныс кеңесі 25 қарашада өткен шұғыл жиынында Ресейдің бұл әрекетін "басқыншылық" деп атап, елде әскери жағдай жариялауды ұсынған.

Оқи отырыңыз: Азов теңізіндегі оқиға: Украина әскери жағдай жариялағысы келеді

Украина Жоғарғы Радасы 26 қарашада елде әскери жағдай жариялау мәселесін талқылайды. Керчь бұғазындағы жағдай бүгін сонымен қатар БҰҰ Қауіпсіздік кеңесінің шұғыл жиынында талқыланады.

  • 16x9 Image

    Өркен ЖОЯМЕРГЕН

    Өркен Жоямерген 2006 жылы әл-Фараби атындағы Қазақ ұлттық университеті журналистика факультетінің бакалаврын, 2008 жылы магистратурасын тәмамдаған. Қызмет жолын "Алматы Ақшамы" газетінен бастаған. Алматы және Астана қалаларындағы бірқатар бұқаралық ақпарат құралдарында жұмыс істеген. Қазір Азаттық Радиосы Астана бюросының жетекшісі. 

    Автормен оның Facebook парақшасында да пікірлесуіңізге болады.

ПІКІРЛЕР

XS
SM
MD
LG