Accessibility links

Белсенділер билікті әйелдерді зорлықтан заңмен қорғауға шақырды


"НеМолчиKZ" қорының негізін салушы Дина Смаилова (оң жақта) депутат Ирина Смирноваға хат пен жұмсақ ойыншық тапсырып тұр. Астана, 27 қараша 2018 жыл.

Астанада "НеМолчиKz" қоғамдық қорының өкілдері парламент пен құқық қорғау органдарына Қазақстан заңдарына әйелдердің құқығын қорғауға қатысты өзгерістер енгізуге шақырып, хат тапсырды.

Қорды құрған Дина Смаилованың айтуынша, олар "Зорлық-зомбылықтың шынайы статистикасы" деп аталатын акция аясында депутаттарға Қазақстан заңдарына әйелдер мен балаларды зорлықтан құқықтық тұрғыдан қорғайтындай өзгерістер енгізуге шақырады. Ол Қазақстанның тұрмыстағы зорлық, жыныстық зорлық және жыныстық бопсалау туралы заңдары жетілмегенін, бір-біріне керағар түстары көп екенін және әйелдер мен балаларды жеткілікті қорғай алмайтынын айтады.

Белсенділер Әділет министрлігі, Жоғарғы сот, президент әкімшілігі және Бас прокуратураға заңға өзгерістер енгізуге қатысты нақты ұсыныстары жазылған хат пен зорлық көрген баланы бейнелейтін жұмсақ ойыншық жолдады.

Белсенділер хатын алуға шыққан мәжіліс депутаты Ирина Смирнова қазір зорлық-зомбылық көру істерінде жәбірленуші мен жауапкер тараптың бітімге келуіне мүмкіндік туғандықтан іс бітіммен аяқталып жататын жайттар да барын айтты. Ол заңдағы зорлық көру ісінде жәбірленуші мен айыпталушы жақтың бітімге келуіне рұқсат беретін ережеге қарсы екенін, белсенділердің оны жою ұсынысын қолдайтынын айтты.

Тыңдай отырыңыз: Зорлыққа қарсылық

Қарашаның 25-інен желтоқсанның 10-ына дейін әлемде БҰҰ-ның ұйымдастыруымен "Зорлықсыз 16 күн" халықаралық акциясы өтіп жатыр.

  • 16x9 Image

    Өркен ЖОЯМЕРГЕН

    Өркен Жоямерген 2006 жылы әл-Фараби атындағы Қазақ ұлттық университеті журналистика факультетінің бакалаврын, 2008 жылы магистратурасын тәмамдаған. Қызмет жолын "Алматы Ақшамы" газетінен бастаған. Алматы және Астана қалаларындағы бірқатар бұқаралық ақпарат құралдарында жұмыс істеген. Қазір Азаттық Радиосы Астана бюросының жетекшісі. 

    Автормен оның Facebook парақшасында да пікірлесуіңізге болады.

ПІКІРЛЕР

XS
SM
MD
LG