АҚШ БҰҰ Бас ассамблеясына ХАМАС исламшыл радикалдық тобын Израильге қарсы террорлық акт жасағаны үшін айыптайтын қарарын өткізе алмады.
Қарар жобасын БҰҰ-ға мүше 87 мемлекет қолдап, 57 мемлекет қарсы дауыс берді. 33 мемлекет қалыс қалды. Қарсы дауыс бергендер арасында Ресей, араб елдері мен Латын Америкасы елдері бар. Құжат қабылдану үшін оны БҰҰ-ға мүше елдердің үштен екісі қолдауы тиіс.
АҚШ-тың БҰҰ-дағы тұрақты өкілі Никки Хейлидің айтуынша, ХАМАС-тың террорлық әрекет жасайтыны "айдан анық". АҚШ қарарында палестиналық топты "зорлық-зомбылық жасап, бейбіт тұрғындарға қауіп төндірді" деп айыптайды. Қарарда ХАМАС-тың Израильдің бейбіт тұрғындар тұратын аудандарын зымыранмен атқылайтыны айтылған.
Израильдің БҰҰ-дағы тұрақты өкілі Данни Данон құжаттың Бас ассамблеяда қабылданбағанына өкінгенімен, ХАМАС-ты айыптайтын қарардың "үлкен қолдауға ие болғанын" айтты.
Биыл маусымда БҰҰ Бас ассамблеясы Израильді палестиналықтарға күш қолданды деп айыптаған. Ол кезде АҚШ қосымша ХАМАС қозғалысы жасап отырған зорлық-зомбылықты айыптайтын қарар ұсынған. Алайда, ол қарар да қабылданбаған.
ПІКІРЛЕР