Қазақстан бүгін тәуелсіздік күні мейрамын атап өтеді. Астана, Алматы мен өзге де қалаларда мерекеге арналған шаралар өткізу жоспарланған. Жексенбі күні таңертең Алматының орталығындағы Тәуелсіздік ескерткішіне гүл қою рәсіміне жергілікті билік басшылары, бірқатар қоғамдық ұйымдардың өкілдері қатысты.
Орталық алаңның алдындағы Алматы қаласы әкімдігі ғимараты маңында полиция қызметкерлері жүр, автобустар, өрт сөндіру теxникасы қойылған деп хабарлайды Азаттық тілшілері.
ФОТОГАЛЕРЕЯ: Тәуелсіздік ескерткішіне гүл қою
Тәуелсіздік ескерткішіне гүл қою
Осыдан 27 жыл бұрын 1991 жылы желтоқсанның 16-сы күні "Қазақстан Республикасының мемлекеттік тәуелсіздігі туралы" конституциялық заңы қабылданған. Қазақстан тәуелсіздік декларациясын бұрынғы СССР құрамындағы елдердің ең соңында жариялаған.
Биылғы Тәуелсіздік мейрамы қарсаңында Астанада өткен жиында сөйлеген ел президенті Нұрсұлтан Назарбаев Қазақстанда өткен 27 жыл ішіндегі жүргізген нарықтық реформаларды, елдің дамуы мен жетістіктерін атап өтті.
"Егемен Қазақстанның басты жетістіктерінің бірі – халқымыздың саны 18 миллионнан асып, тұрғындардың орташа өмір сүру ұзақтығы 72,5 жасқа жетуі. Осы маңызды жеңістеріміз бен игі нәтижелеріміз біз таңдаған бағыттың дұрыс екенін растап отыр" деді Қазақстанды соңғы отыз жылға уақыт үздіксіз басқарып отырған президент Назарбаев.
Қазақстан қоғамында желтоқсанның 16-сы күні тағы екі оқиғаны еске алады. 1986 жылы дәл осы күні Мәскеудің Қазақ ССР-і компартиясы жетекшісі Дінмұхамед Қонаевты қызметтен босатып, орнына республикаға белгісіз Геннадий Колбинді тағайындау туралы қабылдаған шешімі студент және жұмысшы қазақ жастарының наразылық шеруіне ұласқан. Алматының орталық алаңында екі күнге жалғасқан шеруді билік күшпен басып-жаншыды. Желтоқсан оқиғасынан кейін жүздеген адам жоғары оқу орындарынан шығарылды, жұмысынан қуылды. 99 адам сотталған.
2011 жылы желтоқсанның 16-сында Маңғыстау облысындағы Жаңаөзен қаласында еңбекақы мен әлеуметтік төлемдерге байланысты талаптар қойған мұнайшылардың бірнеше айға жалғасқан наразылық шеруіне полиция оқ жаудырған. Ресми дерек бойынша, Жаңаөзен мен Шетпедегі оқиғаларда 17 адам қаза тапқан.
Биыл Қазақстан халқы тәуелсіздік мейрамына байланысты желтоқсанның 19-ына дейін демалады.