Accessibility links

Алматыдағы базарларда "рейд" болғаны хабарланды


Орталық базардағы полиция "рейдінен" кейін кейбір сауда қатарлары сатушысыз қалған. Куәгерлердің бірі жіберген сурет. Алматы, 12 қаңтар 2019 жыл
Орталық базардағы полиция "рейдінен" кейін кейбір сауда қатарлары сатушысыз қалған. Куәгерлердің бірі жіберген сурет. Алматы, 12 қаңтар 2019 жыл

12 қаңтарда жергілікті БАҚ және әлеуметтік желі қолданушылары Алматының түрлі базарларында заңсыз мигранттарды ұстау шаралары өткенін жазды.

Сондай рейдтердің бірі қаладағы "Көк базар" аталып кеткен орталық базарда өткен. Полиция базар маңын қоршап, ондағы саудагерлерді тексерген. "Алматыдағы Көк базардағы гастарбайтердің ұсталуы" атты Youtube желісіне шыққан мына видеоны да жергілікті БАҚ "оқиға орнынан түсірілген" деп жазды.

12 қаңтар күні түсте Азаттық тілшісіне куәгерлердің бірі "Көк базардағы" "тәжік саудагерлерін орнынан таба алмадық. Бәрін полиция ұстап әкеткен" деп айтты. Сауда қатарларының кейбірі сатушысыз қалған.

Дәл осы күні әлеуметтік желі қолданушылары да "заңсыз мигранттарды ұстау операциясы" жайлы көрген-білгендерін жазды. Мысалы, Бағдат Ағыбетов есіммен тіркелген аккаунт иесі Facebook-та: "Барахолка базарында рейд жүріп жатыр.[...] Заңсыз жұмыс жасағандарды басып алып кетіп жатыр. Осындайлар Қарағандыда ылаң салмады ма? Алдын ала сақтық шаралары деп ойлаймын" деп жазды.

Азаттық тілшісі Алматы қалалық көші-қон басқармасына хабарласқан кезде есімін Денис деп таныстырған қызметкер "кеңседе ешкімнің жоқ екенін, рейдке қатысты ешқандай ақпараты жоғын" айтты. Қалалық көші-қон басқармасының тағы бір өкілі "қалалық полицияға хабарласыңыз" деді.

Алматы қалалық ішкі істер департаменті тиісті мерзімде жауап берген жоқ. Медеу аудандық көші-қон басқармасына хабарласқан кезде басқарма өкілдерінің бірі "қалада рейд жүріп жатқанын" растағанымен толық ақпаратты қалалық көші-қон басқармасынан білу керектігін айтты.

Ал Алматы қалалық ішкі істер департаментінің баспасөз хатшысы Салтанат Әзірбекке сілтеме жасаған жергілікті ақпарат агенттіктері "жоспарлы түрде тексеру шаралары өтіп жатқанын" хабарлады.

ПІКІРЛЕР

XS
SM
MD
LG