Accessibility links

Ақсайда KKS-SICIM жұмысшылары еңбек жағдайына наразылық білдірді


KKS-SICIM компаниясының жүздеген жұмысшысы наразылыққа шыққан сәт. Әлеуметтік желіде тараған видеодан скриншот.

7 ақпанда таңертең Батыс Қазақстан облысы Бөрлі ауданы Ақсай қаласындағы KKS-SICIM компаниясының жүздеген жұмысшысы наразылық білдірді. Олар өздерінің айлығы мен жұмыс жағдайына көңілдері толмайтынын айтқан.

- Біз вахталық әдіспен жұмыс істейміз. 28 күн жұмыстамыз, 14 күн демаламыз. Жаңақала ауданынан осы Ақсайға 400 шақырым жерден келіп жұмыс істеймін. Бетон құямын, айлығым - 160 мың теңге. Табысым отбасыма мүлдем жетпейді, - дейді есімін атағысы келмеген жұмысшылардың бірі.

Компанияның атқарушы директоры Алтын Кулбаева Азаттыққа наразылықтың болғанын растады. Оның сөзінше, үш сағатқа созылған наразылықтан кейін екі жақ ортақ мәмлеге келген.

- Наразылық білдірген жұмысшылар айлығы мен жұмысына қатысты бұған дейін арызданған жоқ еді. Неліктен бұлай аяқастынан шыққанын білмеймін. Жиналғандар 160-250 мың теңге айлық алады. Әр жұмысшымен жеке сөйлесіп, айлығын көтеретін болып келістік. Жалақы қанша пайызға өсетінін айта алмаймын, коммерциялық құпия, - деді компания өкілі.

Азаттық тілшісімен сөйлескен жұмысшының сөзінше, жұмыс беруші айлықты 50 пайызға дейін көтеруге уәде берген. Қазір компанияның барлық жұмысшысы жұмысқа шықты деп хабарланды.

KKS-SICIM - мұнай және газ саласында қызмет көрсететін компания.

ПІКІРЛЕР

XS
SM
MD
LG