Accessibility links

Айтыс ақындары мен жыршылар одағы Тоқаев кандидатурасын қолдады


Айтыс ақындары мен жыршы-термешілердің халықаралық одағының жиыны. Алматы, 24 сәуір 2019 жыл.

Айтыс ақындары мен жыршы-термешілердің халықаралық одағы "Нұр Отан" партиясының кандидаты Қасым-Жомарт Тоқаевты қолдайды. Бұл туралы 24 сәуірде Алматыда өткен одақ құрылтайында айтылды.

Одақ төрағасы Жүрсін Ерман президент сайлауына түспейтінін мәлімдеді. Бұған дейін қазақстандық кейбір ақпарат құралдары мен әлеуметтік желіде "Жүрсін Ерман сайлауға кандидатурасын ұсынбақ" деген ақпарат тараған.

Құрылтайда Жүрсін Ерман "әуелде президент сайлауына түсуді ойлағанын айтады. Бірақ Нұр-Сұлтан жақтан бір адамдар "сайлауға қатыссаң, айтыстың жолын жауып алуың мүмкін деп ескерткен". Осыдан кейін ол "сайлауға қатысу ойынан айныған".

Жүрсін Ерман президент сайлауына түсіп, халықтың, биліктің назарын қазақтың айтыс және жыр-терме өнеріне аударғысы келген. Ерманның айтуынша, құрылтайға дейін ол Алматы әкімі, "Нұр Отан" партиясының Алматы қалалық филиалының жетекшісі Бауыржан Байбекпен кездескен.

"Әкім айтысты сіз сайлауға түспесеңіз де қолдаймыз деп уәде берді" дейді Жүрсін Ерман.

Қазақстанның қазіргі президенті Қасым-Жомарт Тоқаевты 23 сәуірде "Нұр Отан" партиясы президент сайлауына кандидат ретінде ұсынған.

Сондай-ақ "Ұлы дала қырандары" республикалық қозғалысы Сәдібек Түгелді, Қазақстан Республикасы кәсіподақтар федерациясынан (ҚРКФ) Амангелді Таспиховті, "Ақжол" партиясы мәжіліс депутаты Дания Еспаеваны президент сайлауына кандидат ретінде ұсынған.

Қазақстанда кезектен тыс президент сайлауы 9 маусымда өтеді. Кандидаттарды ұсыну 28 сәуірде, ал тіркеу 11 мамырда аяқталады.

  • 16x9 Image

    Манас ҚАЙЫРТАЙҰЛЫ

    1994 жылы 20 мамырда дүниеге келген. Әл-Фараби атындағы қазақ ұлттық университетінде филология мамандығы бойынша бакалаврды, Абай атындағы қазақ ұлттық педагогикалық университетінде магистратураны тәмамдаған. 

    "Дарабоз" журналында (2012-2014), "31 арнаның" жаңалықтар қызметінде (2015-2018) жұмыс істеген.

    Автормен оның Facebook парақшасында да пікірлесуге болады.

ПІКІРЛЕР

XS
SM
MD
LG