Accessibility links

"Митингіге қатысты" деп айыпталған үш белсендіге шыққан сот шешімі өзгермеді


"Митингіге қатыспағандарын" дәлелдегісі келетін үш белсенді - Әйгерім Мұхамеджанова, Әлия Ізбасарова мен Жанбота Әлжанова, Нұр-Сұлтан, 11 шілде 2019 жыл.

16 шілдеде Нұр-Сұлтанда апелляциялық сот «9 маусымда билікке қарсы наразылық шарасына қатысты» деп айыппұлмен жазаланған үш белсендінің шағымын қанағаттандырмады.

Әлия Ізбасарова, Әйгерім Мұхамеджанова және Жанбота Әлжанова 9 маусымда кешкісін Байқоңыр аудандық полиция бөлімінде ұсталып, «бейбіт митинг өткізу ережесін бұзды» деген айыппен әрқайсы 50500 мың теңге айыппұлмен (130 доллар) жазаланған. Үшеуі де бұл шешімге қарсы апелляциялық шағым түсірген. Олар «9 маусымда наразылық шарасына қатыспағандарын» айтады.

Судья Сансызбек Райымбаев бірінші соттың шешімін өзгеріссіз қалдырды. Адвокат Василий Садыковтың сөзінше, судья үш белсенді ісінде «жаңа деректер анықталғандықтан» оларға бірінші сот инстанциясына қайта шағымдануға кеңес берген.

Соңғы айларда Қазақстанда билікке наразылық күшейіп тұр. 9 маусым кезектен тыс президент сайлауы өткен күні полиция билікке қарсы наразылыққа шыққан мыңдаған адамды ұстады. Халық билік жүйесін өзгертуді, әділ сайлауға жол ашуды талап еткен.

Елдегі сайлауға, билікке қарсылыққа қарамастан Қасым-Жомарт Тоқаев жеңімпаз деп танылды. Тоқаевты кандидат ретінде елді отыз жылдай басқарып, президенттіктен кеткен Нұрсұлтан Назарбаев таңдаған. Халықаралық бақылаушылар сайлау кезінде заң бұзу фактілері болғанын айтып, полицияның наразылыққа шыққандарды жаппай ұстауын сынады. Жергілікті бақылаушылар да сайлау учаскелерінде бюллетеньдерді топтап тастау фактілері мен алдын ала белгіленген бюллетеньдер жайлы айтса да, сот олардың арызын қанағаттандырмады.

  • 16x9 Image

    Сәния ТОЙКЕН

    Сәния Тойкен Азаттық радиосында 2007 жылдан бері жұмыс істейді. ҚазҰУ-дің журналистика факультетін бітірген. Республикалық  "Қазақстан пионері", "Жас Алаш" газеттерінде тілші болған. Қазақстан Республикасы Жекешелендіру жөніндегі комитетінің баспасөз хатшысы қызметін атқарған. Атырау облыстық "Ақ Жайық" газетінде  тілші, қазақ редакциясының редакторы, Маңғыстау облысында шығатын "Не хабар?!" апталығының редакторы болып жұмыс істеген. 

    Сәния Тойкен 2017 жылы журналист әйелдердің халықаралық қоры (IWMF) тағайындаған "Журналистикадағы батылдығы үшін" сыйлығын иеленді. Ол - бұл беделді сыйлықты алған алғашқы қазақстандық журналист.

ПІКІРЛЕР

XS
SM
MD
LG