Мәскеудің Пресненский соты 27 шілдедегі митингіге қатысқаны үшін бес азаматты екі айға қамады. Бұл ақпаратты Азаттықтың Орыс қызметі хабарлады.
Кирилл Жуков, Иван Подкопаев, Алексей Миняйло, Егор Жуков және Самариддин Раджабовқа "жаппай тәртіпсіздікті ұйымдастыру" ісі бойынша айып тағылды.
Бұған дейін Подкопаев "бейбіт жиын өткізу тәртібін бұзғаны үшін" сегіз күнге қамалған. 1 тамызға қараған түні оны тергеуге әкетті. 28 жастағы Кирилл Жуковқа әуел баста акцияға қатысқаны үшін айыппұл салынған. Кейіннен тергеу комитеті оған да жаңа айып тақты. Жуковтың адвокаты ұсталған сәттен бері оның аштық жариялап жатқанын айтты. Іс материалдарына сәйкес, 21 жастағы Самариддин Раджабов митингі болған күні Росгвардия жасақтарына пластик бөтелке лақтырған. Бөтелке сарбаздардың біріне қатты тиген. Раджабов бұған дейін 10 күнге қамалған еді. Ол сотта митингіге кездейсоқ тап болғанын, арнайы бармағанын айтқан.
Ал видемәлімдеме таратқан Алексей Миняйло 27 шілде күнгі митингіге қатыспағанын, себебі оны акция алдында ұстап әкеткенін айтқан. Ол елін жақсы көретіндіктен осындай жағдайға тап болғанын жеткізген. Сот оны 27 қыркүйекке дейін қамау туралы шешім шығарды.
21 жастағы студент Егор Жуковты да сот 27 қыркүйекке дейін қамады. Сот отырысы кезінде әкесі темір тордан оған су бермек болып еді, сот айдауылдары бұған рұқсат бермеді.
"Агора" құқық қорғау ұйымының жетекшісі Павел Чиковтың хабарлауынша, "жаппай тәртіпсіздік" ісі бойынша 84 тергеуші жұмыс істеп жатыр. Оны "Полицияға күш қолдану" ісімен біріктірген.
27 шілдеде Мәскеу орталығында бірнеше мың адам қатысқан митингі өткен. Оған қатысушылар тәуелсіз кандидаттарды қалалық дума сайлауына жіберуді талап еткен. Акция барысында мыңнан астам адам ұсталған. Акцияны тарату үшін полиция күш қолданды. Ондаған адам жараланды. Тергеу комитеті "жаппай тәртіпсіздік ұйымдастыру" және "полицияға күш қолдану" бойынша қылмыстық іс қозғаған.
Қарай отырыңыз: Мәскеудегі шеру қалай өтті? (27 шілде 2019 жыл).
ПІКІРЛЕР