Accessibility links

"Сәрсенбайұлының өліміне қатысы бар" сотталушы шартты жазамен босап шығуды сұрайды


Виталий Мирошниковтің түрме жазасын шартты жазаға ауыстыру туралы шағымын қараған сот отырысы. Алматы, 5 тамыз 2019 жыл.

5 тамызда Алматы қаласы Түрксіб аудандық соты оппозициялық саясаткер Алтынбек Сәрсенбайұлының өліміне қатысы бар деп 20 жылға сотталған Виталий Мирошниковтің түрме жазасын шартты жазаға ауыстыру туралы шағымын қарай бастады.

Мирошников сот отырысына Алматыдағы тергеу изоляторында отырып, видеоконференция арқылы қатысты.

Оппозиция лидері болған Алтынбек Сәрсенбайұлы мен оның екі көмекшісі Василий Журавлев және Бауыржан Байбосынды 2006 жылы 11 ақпанда ұрлап әкеткен. 13 ақпанда олардың денесі Алматы маңынан табылған.

Алматыдағы сотқа Алтынбек Сәрсенбайұлының ағасы, журналист Рысбек Сәрсенбай қатысып жатыр. Ол 5 тамыз ертесімен Facebook парақшасында Мирошниковтің өтінішін қарайтын сотқа шақырту алғанын, бірақ Алтынбек Сәрсенбайұлының ағалары мен қарындастары, Бауыржан Байбосын мен Василий Журавлевтің туыстары бұл сот жайлы білмейтінін жазды.

Прокурор мен Мирошников қамауды отырған абақты қызметкері сот отырысына журналистердің қатысуына қарсы болды. Мирошников пен оның мемлекет тағайындаған адвокаты журналистердің қатысуына қарсы емесін айтты. Ал жәбірленуші тарап ретінде келген Рысбек Сәрсенбай мен құқық қорғаушы Маржан Аспандиярова тілшілер сот залында қалдыруды талап етті. Судья Айсара Жылқыбаева бастапқыда журналистерді залдан шығару туралы шешім қабылдап, соңынан отырыста қалдырды.

Отырысқа видео арқылы қатысқан Мирошников судяның сұрақтарын дұрыс естімегені байқалды. Құқық қорғаушы Маржан Аспандиярова мен Рысбек Сәрсенбай Мирошниковті сот залына әкелуді талап етті. Сәрсенбай мен Аспандиярова судьяға сенімсіздік білдіретінін мәлімдеді. Олар «судья сот процесін дұрыс жүргізбеді, процессуалдық процесті бұзды» деп есептейтінін айтты. Түстен кейін жәбірленуші тараптың бұл шағымы қанағаттандырылмағаны белгілі болды. Шағымды Айсара Жылқыбаева қарай бермек.

Мирошников шағымы қанағаттандырылса, ол Алтынбек Сәрсенбайұлы мен екі көмекшісінің өліміне қатысты түрме жазасы шартты жазаға ауыстырылған кезекті сотталушы болады. Бұл іске қатысы бар деп сотталған ҰҚК-нің «Арыстан» бөлімінің қызметкерлері босап шыққан. «Алтынбек Сәрсенбайұлы мен екі көмекшісін өлтіру жоспарын жүзеге асырды» деп айыпталған бұрынғы полицей Рустам Ибрагимов өмір бойы түрме жазасына кесілген.

2014 жылы қарашада сот «Алтынбек Сәрсенбайұлын өлтіруге тапсырыс берді» деп айыпталып, 20 жылға сотталған парламент сенаты аппаратының бұрынғы басшысы Ержан Өтембаевтың түрме жазасын шартты жазаға ауыстырған. Оның алдында, 2014 жылы ақпанда сот Өтембаевтың жазасын 13 жылға қысқартқан. Сот ол «Алтынбек Сәрсенбайұлын өлтіруге тапсырыс берген жоқ, оны және көмекшілерін өлтіруге септесті» деген. Тергеу мен прокуратура 2013 жылы Сәрсенбаевты өлтіруге елдің бұрынғы президенті Нұрсұлтан Назарбаевтың күйеу баласы Рахат Әлиев тапсырыс бергенін мәлімдеген.

Оқи отырыңыз: Алтынбектің өмірі мен өлімі

Алтынбек Сәрсенбайұлының жақындары Өтембаевтың шартты түрде түрмеден босап шығуына қарсы шағым түсіргенімен, сот оны қанағаттандырмады. Алтынбек Сәрсенбайұлының ағасы Рысбек Сәрсенбай «Өтембаев тапсырыс берушілердің нақты кім екенін ашып айтпады» деп санайды. 2018 жылы маусымда Өтембаев өмірден өтті.

Рахат Әлиев «Өкіл қайын ата» кітабында Алтынбек Сәрсенбайұлының өліміне тапсырыс бергендерді жоғарғы биліктен іздеу керегін жазған. Әлиев 2015 жылы ақпанда австриялық түрмеде өлі күйінде табылған. Австрия билігі Әлиев өз-өзіне қол салғанын хабарлаған.

  • 16x9 Image

    Асылхан МАМАШҰЛЫ

    1973 жылы 22 сәуірде дүниеге келген. 1994 жылы Қорқыт ата атындағы Қызылорда пединститутын бітірген. 1997-2000 жылдары әл-Фараби атындағы Қазақ ұлттық университетінің аспирантурасында оқыған. "Қазақ энциклопедиясы" баспасында (2001-2007), республикалық "Ана тілі" газетінде (2007-2009) , "ABDI-press" орталығында (2009-2010) жұмыс істеген. 2011 жылдан Азаттық радиосының тілшісі.

    Тарихи, саяси мәселелер тақырыбында жазады, белгілі тұлғалардың саяси портреттерін жасайды. Автормен оның Facebook парақшасында да пікірлесуіңізге болады.

ПІКІРЛЕР

XS
SM
MD
LG