Accessibility links

Түркістанда мемлекет мұқтажына үйі алынған екі тұрғын өз-өзіне қол салмақ болды


Үйлері мемлекет мұқтажына алынған екі тұрғынның наразылығы. Түркістан, 14 тамыз 2019 жыл.

Түркістан қаласында мемлекет мұқтажына үйі алынған екі тұрғын өз-өзіне қол салмақ болды. Оқиғаны қалалық әкімдіктің баспасөз қызметі растады.

15 тамызда Facebook әлеуметтік желісінде Түркістан қаласындағы екі тұрғынның өз-өзіне қол салмақ болған видеосы тарады. Видеода үйінің шатырына шығып алған ер адам газ баллонын жармақ болған. Ол үйінің сүрілуіне қарсылық білдірген. Үйді полиция қоршап, наразы адамды қала әкімі Рашид Аюпов төменге түсуін сұраған. Екінші видеода егде тартқан әйел үйінің ішінде пышақпен тамырын кеспек болған. Видеода әйелді полицейлер сабырға шақырғаны байқалады.

Түркістан қаласы әкімінің баспасөз қызметінің мәліметінше, видеодағы оқиға 14 тамыз күні болған. Тұрғындардың үйін мемлекет мұқтажына қайтару үшін сот шешімі шыққан. Олардың үйі 25 миллион теңгеге (шамамен 65 мың доллар) бағаланған. Бұл ақшаны азырқанған тұрғындар үйінің сүрілуіне қарсы болған.

"Тұрғындар аман. Олармен жұмыс жүргізілді. Екі отбасы да басқа үйге көшті. 15 тамыз күні екі үй де сүрілді" деп хабарлады әкімдіктің баспасөз қызметі.

Әкімдіктің дерегінше, бұл үйлердің орнына "Рухани-мәдени орталық" салынады. Оның жалпы көлемі – 98 гектар.

  • 16x9 Image

    Дилара ИСА

    Дилара - Азаттықтың Шымкенттегі тілшісі. 1986 жылы туған. Солтүстік Қазақстан мемлекеттік университеті мен Абай атындағы ҚазҰПУ-ді бітірген.

    "Жас Алаш" газетінде жұмыс істеген.

    Азаттықпен 2012 жылдан бері әріптес.

ПІКІРЛЕР

XS
SM
MD
LG