Accessibility links

Нұр-Сұлтанда монстрация өткізбек болған жастарға полиция айыппұл салды


"Хан шатыр" ойын-сауық кешені жанынан жеткізілген жастар полиция бөлімшесінің алдында тұр. Нұр-Сұлтан, 25 тамыз 2019 жыл.

25 тамыз күні Нұр-Сұлтандағы "Хан шатыр" ойын-сауық кешені алдында монстрация қойылымын өткізбек болған бірнеше жас азаматты полиция әкетті.

Олардың бірі - "Қаhарман" қозғалысының мүшесі Әлия Ізбасарованың Азаттық тілшісіне айтуынша, өздері жоспарлаған шараға суреттер мен басқа да заттарын әзірлеп апарған жастардан ойын-сауық кешені алдына барған полиция мен әкімдік өкілі "митингіні доғаруды" талап еткен. Бұл жерге митинг емес, әзіл-сықақ шарасын өткізуге жиналғанын түсіндірмек болған жастарды полиция автобусына салып, "Хан шатыр" маңынан алып кеткен.

Нұр-Сұлтанда монстрация өткізбек болған жастарды полиция ұстады
please wait

No media source currently available

0:00 0:01:30 0:00

- Біз тек әзіл-сықақ мазмұнында әзірленген плакаттарымызды шығарып, біраздан соң тараймыз деп ойлағанбыз. Бірақ әкімдік өкілі мен полиция ескертуінен кейін кетуге жинала бастадық. Полиция өкілдері бізді аялдамаға дейін "шығарып саламыз" деп айтты да, автобусқа салып полиция бөліміне әкетті. Кейін әрқайсымызға хаттама толтырған соң босатты, - дейді Әлия Ізбасарова.

Оның сөзінше, жастар шара өткізуге әзіл-сықақ жазылған плакаттардан бөлек екі сиырдың костюмі мен "Екі сиыр елді құтқаруға дайын" деген орысша жазуы бар баннер дайындап апарған. "Плакаттарымызды да, басқа заттарымызды да түгел полиция алып қойды" дейді Анастасия Гузева.

Асқар Абаев, Анастасия Гузева, Лейла Қалабаева, Жанбота Әлжанова, Әйгерім Мұхамеджанова, Әлия Ізбасарова, Айжан Қасымова, Елизавета Цой мен Дана Бегазинованы Нұр-Сұлтандағы Есіл аудандық полиция басқармасына қарасты 18-бөлімшеге жеткізіп, олардан түсініктеме алған. Оларға әкімшілік құқық бұзушылық кодексінің 443-бабы бойынша "Қоғамдық тәртіпті қамтамасыз етуге қатысатын адамның заңды талабына бағынбағаны" туралы әкімшілік хаттама толтырған.

Полиция бөлімшесінде белсенділердің бірі Жанбота Әлжанованың денсаулығы нашарлаған соң оны жедел жәрдем көлігімен ауруханаға алып кеткен.

Азаттық тілшісі полиция бөлімшесіне келгенде дәлізде отырған прокурор Айдан Омаров "Хан шатыр" кешені жанынан жеткізілгендердің барлығы үйлеріне қайтып кеткенін айтты. Ал кезекші полиция қызметкері Абай Батырқұлов қыздарды босатып қоя бергендерін, бөлімше ішінде тек бір жігіттің қалғанын хабарлап, бұдан басқа ақпарат беруден бас тартты.

Адвокат Ольга Энн (ақ түсті жейдеде) "Хан шатыр" алдынан полиция әкеткен жастармен бірге билік өкілдерінің іс-әрекетіне шағым жазып жатыр. Нұр-Сұлтан, 25 тамыз 2019 жыл.
Адвокат Ольга Энн (ақ түсті жейдеде) "Хан шатыр" алдынан полиция әкеткен жастармен бірге билік өкілдерінің іс-әрекетіне шағым жазып жатыр. Нұр-Сұлтан, 25 тамыз 2019 жыл.

Белсенділердің адвокаты Ольга Эннің сөзінше, полиция өкілдері оған "учаскеге жеткізілгендерге хаттама көшірмесі ұсынылғанын, бірақ олардың алудан бас тартқанын" айтқан.

- Әрине, ешкімге ештеңе ұсынбағаны белгілі. Бұлар сол хаттамаға сәйкес айыппұл төлейді, бірақ біз міндетті түрде шағымданатын боламыз, - деді заңгер Азаттыққа.

"Қаhарман" қозғалысының белсенділері 24 тамызда Facebook әлеуметтік желісіндегі парақшаларына "Хан шатыр" ойын-сауық кешені жанындағы Nur Sultan жазуы алдында әзіл-сықақ шарасын (монстрация) өткізетіндерін хабарлап, жұртшылықты оны тамашалауға және өз үлестерін қосуға шақырған. Олар шара барысында Қазақстанның бұрынғы президенті, биліктегі "Нұр Отан" партиясының төрағасы Нұрсұлтан Назарбаевтың 21 тамызда Нұр-Сұлтанда өткен партия жиынында мемлекеттен жәрдем сұраған тұрғындарды "үкіметке қол жаяды" деп сөгіп, "микрокредит алып екі сиыр сатып ал да, өзіңді асыра" деп айтқан сөзіне байланысты әзіл-сықақ көрініс қоюды жоспарлаған.


  • 16x9 Image

    Сәния ТОЙКЕН

    Сәния Тойкен Азаттық радиосында 2007 жылдан бері жұмыс істейді. ҚазҰУ-дің журналистика факультетін бітірген. Республикалық  "Қазақстан пионері", "Жас Алаш" газеттерінде тілші болған. Қазақстан Республикасы Жекешелендіру жөніндегі комитетінің баспасөз хатшысы қызметін атқарған. Атырау облыстық "Ақ Жайық" газетінде  тілші, қазақ редакциясының редакторы, Маңғыстау облысында шығатын "Не хабар?!" апталығының редакторы болып жұмыс істеген. 

    Сәния Тойкен 2017 жылы журналист әйелдердің халықаралық қоры (IWMF) тағайындаған "Журналистикадағы батылдығы үшін" сыйлығын иеленді. Ол - бұл беделді сыйлықты алған алғашқы қазақстандық журналист.

ПІКІРЛЕР

XS
SM
MD
LG