Accessibility links

Алматыда бір топ жас конституция реформасын талап етіп, марш өткізді


Алматыдағы жастар маршы. 30 тамыз 2019 жыл.

30 тамызда түстен кейін Алматыдағы Арбатта Oyan, Qazaqstan жастар қозғалысының белсенділері марш өткізіп, конституцияны реформалауды талап етті.

Конституция баптарынан үзінді жазып алып, "Конституция реформасы үшін", "Оян, Қазақстан!" деп айқайлаған жастар Жібек жолы бойымен жүріп, Панфилов көшесіне бұрылып, "Астана" алаңына барды.

- Қазақстанның президенттік басқару жүйесінен бас тартатын кезі келді. Еліміз парламенттік республика болуы керек. Қоғам демократияға зәру. Еліміз демократияға дайын емес сияқты тіркестердің мәні жоқ. Өзгеріс жасайтын кез келді, - деді жастардың бірі Димаш Альжанов марш кезінде.

Ел конституциясы қабылданған бұрынғы парламент ғимараты, қазіргі Қазақ-Британ техникалық университетінің алдында плакат ұстап, біраз аялдаған жастар қазіргі конституцияны өзгерту қажеттігін айтып, Панфилов бойымен қаланың жоғарғы бөлігіне қарай бет алды.

Азаттық оқиға орнынан тікелей эфирде хабар таратты:

Қабанбай көшесіндегі Абай атындағы опера және балет театры алдында әрі қарай шерулерін жалғастырған жастар "Біздің таңдауымыз бар!", "Парламенттік республика" деп айқайлады. Маршқа қозғалыстың шамамен 15-20 белсендісі қатысты.

Oyan, Qazaqstan қозғалысының белсендісі Әсем Жапишева Азаттық тілшісіне шеруге бір күн қалғанда белгісіз бірнеше адамның өзін аңдып, қорқытпақ болғанын айтты.

- Кеше артымнан екі-үш адам аңдып жүрді. Мен шыдамай, оларды камераға түсіре бастадым. Олар бізден қашып кетіп қалды. Оның бәрі бүгінгі шерумен байланысты. Біз бұған дейін шерудің нақты қай жерде болатынын айтпадық. Себебі, омондардың келіп, азаматтарды ұстағанын қаламадық. Бірақ олар жаңағыдай жолдармен бізді қорқытқысы келеді. Одан түк шықпайды, - деді Әсем Жапишева.

Азаттық тілшісінің хабарлауынша, оқиға орнында Алматы қалалық полиция департаменті бастығының орынбасары Ізбасар Бектұров та болған. Бірақ полиция қызметкерлері шараның өтуіне кедергі жасамады. Шамамен 45 минутқа созылған шара жергілікті уақыт бойынша кешкі алтыға таман аяқталды.

Дәл осыған ұқсас акция 30 тамызда Нұр-Сұлтан қаласында да өтті. Қаладағы "Нұржол" бульварына кешке қарай жиналған Oyan, Qazaqstan, "Республика" қозғалысының өкілдері конституциядан үзінділер оқып, елдегі адам құқығы ахуалын, саяси тұтқындар мәселесін сөз етті.

- Шын мәнінде көп жас осылайша пікірлерін айтуға қорқады. Біздің артымызда пікірлерін айтқысы келетін, бірақ қорқатын жүздеген, мыңдаған жастардың бар екенін білемін, - деді шараға келгендердің бірі.

Жастардың бірі пікірін ашық айтқан жастарға қысым көбін айтса, бірі елдегі қиындықтарға байланысты шетелге кетіп жатқан жастар мәселесін қозғады.

30 тамыз Қазақстанда Конституция күні аталып өтеді. 1995 жылы қабылданған конституцияның құрметіне елде демалыс жарияланған.

1995 жылы қабылданған Қазақстан конституциясына бірнеше рет президенттің өкілетін кеңейтіп, биліктің ықпалын күшейтетін өзгерістер енгізілген. Конституция реформасын талап еткен акциялар бүгін Шымкент пен Нұр-Сұлтанда да өтті.

Биыл маусымда құрылған Oyan, Qazaqstan қозғалысының белсенділері саяси реформаларды, партия мен қоғамдық бірлестіктер құруға қойылатын талаптарды алып тастау мен сайлау заңына өзгеріс енгізуді талап етеді. Қозғалысты құрғандар ресми тіркеуге өтініш бермейтінін, саяси партиямен серіктес болмайтынын, сондай-ақ ішкі және шетелдік ұйымдардан қаржы алмайтынын мәлімдеген.

  • 16x9 Image

    Манас ҚАЙЫРТАЙҰЛЫ

    1994 жылы 20 мамырда дүниеге келген. Әл-Фараби атындағы қазақ ұлттық университетінде филология мамандығы бойынша бакалаврды, Абай атындағы қазақ ұлттық педагогикалық университетінде магистратураны тәмамдаған. 

    "Дарабоз" журналында (2012-2014), "31 арнаның" жаңалықтар қызметінде (2015-2018) жұмыс істеген.

    Автормен оның Facebook парақшасында да пікірлесуге болады.

  • 16x9 Image

    Өркен ЖОЯМЕРГЕН

    Өркен Жоямерген 2006 жылы әл-Фараби атындағы Қазақ ұлттық университеті журналистика факультетінің бакалаврын, 2008 жылы магистратурасын тәмамдаған. Қызмет жолын "Алматы Ақшамы" газетінен бастаған. Алматы және Астана қалаларындағы бірқатар бұқаралық ақпарат құралдарында жұмыс істеген. Қазір Азаттық Радиосы Астана бюросының жетекшісі. 

    Автормен оның Facebook парақшасында да пікірлесуіңізге болады.

ПІКІРЛЕР

XS
SM
MD
LG