Accessibility links

Жаңаөзендіктер Қытайдың Қазақстандағы жобаларын тоқтатуды талап етті


"Қытайдың Қазақстанда 55 зауыт ашатынына" қарсы шыққан жаңаөзендіктер. 2 қыркүйек 2019 жыл.

Бүгін, 2 қыркүйекте Жаңаөзенде жүзге жуық қала тұрғыны әкімдік маңына жиналып, Қазақстан билігінің Қытаймен бірігіп, ел территориясында өндіріс, құрылыс, ет пен дақылдар өңдеу және басқа шаруашылық салалары бойынша 55 зауыт салу туралы шешіміне қарсылық білдірді. Олар Қазақстан президенті Қасым-Жомарт Тоқаевқа үндеу жариялады.

Жиналғандар президент Қасым-Жомарт Тоқаевтан 11-12 қыркүйекте Қытайға жоспарланған ресми сапарынан бас тартуды талап етті. Әкімдік алдына келгендер биліктен не үшін Қытайдан қарыз алғанын түсіндіруді сұрады.

Наразыларға Жаңаөзен қаласы әкімінің орынбасары Аманғали Нұрдәулетов шығып, халықты басуға тырысты. Бірақ жиналғандар оның сөзін тыңдамай, облыс әкімінің келуін талап етті.

Қала әкімдігіне келген жаңаөзендіктердің айтуынша, Жаңаөзенге Маңғыстау облысы әкімі Серікбай Тұрымов келіп елмен кездесетіні хабарланған соң жиналғандар тараған. Жаңаөзендіктердің наразылық шарасына ешкім кедергі келтірген жоқ.

Наразылар талабы туралы Азаттық тілшісі Маңғыстау облыстық әкімдігінің баспасөз қызметіне хабарласқан еді. Әкімдіктің баспасөз хатшысы Самат Сүлей "талап анықталған соң айтамыз" деп жауап берді.

18 тамызда Нұр-Сұлтан тұрғыны Асқар Қайырбек те "55 зауыт Қытайға қайтарылсын!" деген талаппен бір адамдық пикет өткізген еді.

Бұған дейін Қазақстанның бұрынғы президенті Нұрсұлтан Назарбаев 2019 жылы сәуірде Қытай басылымдарына берген сұхбатында Қытайдың Қазақстандағы 55 ірі жобасының 15-і жұмысын бастағанын, 11 нысан биыл пайдалануға берілетінін айтқан.

Қытай - Қазақстанға ең көп инвестиция құятын - төртінші, ең көп қарыз беретін үшінші ел. Қытай Қазақстанды шикізат көзі, сауда нарығы және транзит аймағы ретінде пайдаланады. Былтыр Қытай Қазақстанға екі миллиард 62 миллион юань көлемінде кредит берген. Қазақстанның Қытайға қарызы 12 миллиард доллардан асады.

  • 16x9 Image

    Сәния ТОЙКЕН

    Сәния Тойкен Азаттық радиосында 2007 жылдан бері жұмыс істейді. ҚазҰУ-дің журналистика факультетін бітірген. Республикалық  "Қазақстан пионері", "Жас Алаш" газеттерінде тілші болған. Қазақстан Республикасы Жекешелендіру жөніндегі комитетінің баспасөз хатшысы қызметін атқарған. Атырау облыстық "Ақ Жайық" газетінде  тілші, қазақ редакциясының редакторы, Маңғыстау облысында шығатын "Не хабар?!" апталығының редакторы болып жұмыс істеген. 

    Сәния Тойкен 2017 жылы журналист әйелдердің халықаралық қоры (IWMF) тағайындаған "Журналистикадағы батылдығы үшін" сыйлығын иеленді. Ол - бұл беделді сыйлықты алған алғашқы қазақстандық журналист.

ПІКІРЛЕР

XS
SM
MD
LG