Accessibility links

Алматыда ипотекалық несие борышкерлері банкке талаппен барды


Қазақстан халық банкіне келген борышкерлер талаптарын айту үшін банк өкілдерін күтіп отыр. Алматы, 16 қыркүйек 2019 жыл.

16 қыркүйекте Алматыда бір топ азамат өздері алған ипотекалық несие қарызын үкімет қабылдаған бағдарламаға сәйкес азайтуды талап етіп, Қазақстандағы ең ірі коммерциялық қаржы мекемесі - Қазақстан халық банкіне барды. Бастамашыл топтың талабын жеткізген Ұлданай Қамбарованың сөзінше, борышкерлердің ипотекалық қарыздарын қайта қаржыландыру жөніндегі үкімет бағдарламасының үшінші бөлігі іске асуы үшін коммерциялық банктердің барлығының келісімі қажет.

Банк қызметкерлері 50 шақты адамға және борышкерлердің талабынан кейін журналистерге де кеңсенің ішіне кіруге рұқсат етті. Борышкерлерге әзірге банк басшылығынан ешкім шыққан жоқ.

Қазақстанда 2015 жылы азаматтардың ипотекалық несие қарыздарын қайта қаржыландыру қолға алынған. Бағдарламаның бірінші бөлігі 2004-2009 жылдар аралығында несие алған, иелігінде басқа баспанасы жоқ азаматтарды қолдауға бағытталған. Бағдарламаның екінші бөлігі 2016 жылғы 1 қаңтарға дейін шетел валютасымен қарыз алғандардың борышын қайта қаржыландыруды көздейді.

Қазақстан Ұлттық банкі өткен жылдың соңында коммерциялық банктердің 2016 жылғы 1 қаңтарға дейінге кезеңде шетел валютасымен берген ипотекалық несие қарызын қайта қаржыландыру мерзімін 15 шілдеге дейін созған. Ұлттық банк шетел валютасымен алынған ипотекалық қарызды қайта қаржыландыру үшін өз есебінен банктерге кейін қайтаратын негізде 156 миллиард теңге (сол кездегі бағаммен 403,4 миллиард доллар) бөлгенін хабарлаған.

Мамыр айында оннан астам қоғамдық бірлестіктер өкілдері енген топ биліктегі "Нұр Отан" партиясының Алматыдағы кеңсесіне барып, проблемалық несиелер мен әлеуметтік жағдайы төмен азаматтарды қорғайтын шара қабылдау туралы үкіметке қойған талаптарын жария еткен.

Қоғамда наразылық күшейіп, инфляция деңгейі өсіп, ұлттық валюта құнсыздана бастаған шақта үкімет әлеуметтік жағдайы нашар отбасыларын қолдау шаралары іске асырылатыны туралы мәлімдеген болатын.


  • 16x9 Image

    Мәншүк АСАУТАЙ

    1980 жылы туған. Е.Бөкетов атындағы Қарағанды мемлекеттік университетін бітірген.

    Қарағанды қаласындағы жергілікті телеарнада қызмет еткен. 2004 жылдан бері Азаттықтың тілшісі. 

    Автормен оның Facebook парақшасында да пікірлесуге болады.

ПІКІРЛЕР

XS
SM
MD
LG