Accessibility links

"СИНОПЭК Қазақстан" жұмысшылары жалақы өсіруді талап етті


"СИНОПЭК Қазақстан" жұмысшылары компания кеңсесінің алдында тұр. Ақтау, 24 қыркүйек 2019 жыл.

«СИНОПЭК Қазақстан халықаралық мұнай қызметі компаниясының» Ақтау филиалының ондаған жұмысшысы жалақы өсіруді талап етті. Маңғыстау облысындағы Қарақұдық мұнай және Солтүстік Бұзашы кен орнындағы ұнғымаларды жөндейтін жұмысшылар 23 қыркүйек кешке жұмысты тоқтатқан.

Бұл туралы Азаттыққа 24 қыркүйекке компания бұрғылаушысының көмекшісі Жәнібек Елдешов айтты. Оның сөзінше, жұмысшылар жалақыны 100 пайызға өсіруді талап етіп, 24 қыркүйекте компанияның Ақтаудағы кеңсесіне барған.

Елдешов жұмысшылар бұған дейін талаптарын хатқа түсіріп, компания басшылығына, «Нұр Отан» партиясының облыстық филиалына және мұнай компанияларының кәсіподағына тапсырғанын айтады. Оның айтуынша, хатқа Қарақұдық мұнай және Солтүстік Бұзашы кен орнының 150-ден астам жұмысшысы қол қойған.

Елдешовтің сөзінше, жұмысшылардың талап айтқан наразылығы 23 қыркүйек жергілікті уақыт бойынша 17.00-де басталған. Ол «осы уақыттан бастап жұмысшылар кен орнына барғанымен ешқандай жұмыс істемей отырғанын» айтады.

«СИНОПЭК Қазақстан халықаралық мұнай қызметі компаниясынан» және Маңғыстау облысы әкімдігінен осы жайтқа байланысты пікір алу мүмкін болмады. Тек Мағыстау облысы еңбек департаменті бастығының орынбасары Шыңғыс Дүйсенов «қазір жұмысшылар мен компания арасында келіссөз жүріп жатқанын» айтты. Ол жұмысшылардан департаментке бұған дейін жалақы мәселесіне қатысты шағым түскенін растады.

Теңге құнсызданып, инфляция күшейген тұста Қазақстанның батысында мұнайшылардың жалақы өсіруді талап еткен наразылық шаралары көбейді. Бұған дейін болған жұмысшылар наразылығында компаниялар жұмысшылардың талабын орындаған.

  • 16x9 Image

    Сәния ТОЙКЕН

    Сәния Тойкен Азаттық радиосында 2007 жылдан бері жұмыс істейді. ҚазҰУ-дің журналистика факультетін бітірген. Республикалық  "Қазақстан пионері", "Жас Алаш" газеттерінде тілші болған. Қазақстан Республикасы Жекешелендіру жөніндегі комитетінің баспасөз хатшысы қызметін атқарған. Атырау облыстық "Ақ Жайық" газетінде  тілші, қазақ редакциясының редакторы, Маңғыстау облысында шығатын "Не хабар?!" апталығының редакторы болып жұмыс істеген. 

    Сәния Тойкен 2017 жылы журналист әйелдердің халықаралық қоры (IWMF) тағайындаған "Журналистикадағы батылдығы үшін" сыйлығын иеленді. Ол - бұл беделді сыйлықты алған алғашқы қазақстандық журналист.

ПІКІРЛЕР

XS
SM
MD
LG