Accessibility links

Апелляциялық сот белсенді Жахин және Халықованың үкімін өзгертпеді


"ҚДТ қозғалысын қолдады" деп айыпталған Серік Жахин сотта. Нұр-Сұлтан, 16 қыркүйек 2019 жыл.

26 қарашада Нұр-Сұлтан соты елде тыйым салынған "Қазақстанның демократиялық таңдауы" қозғалысына "қатысы бар" деп айыпталып, бір жылға бостандығы шектелген белсенділер Серік Жахин және Гүлмира Халықованың апелляциялық шағымын қанағаттандырмады.

Екі белсендінің адвокаттары апелляциялық соттан алғашқы инстанцияның шешімін толық жоюды сұраған. Апелляциялық шағым қаралған отырыста Жахиннің адвокаты Аманжол Мұхамедияров белсендінің айыбы дәлелденбегенін жеткізді. Ал Халықованың адвокаты Әсел Тоқаева белсендінің желідегі посты оның жеке пікірі екенін айтты. Шағымды қараған судьялар адвокаттардың уәжін ескермеді және алғашқы соттың үкімін өзгертпеді.

15 қазанда Нұр-Сұлтандағы №2 Сарыарқа аудандық соты "Facebook парақшасында тыйым салынған ұйымның ақпараттарын бөлісті" деп айыпталған Серік Жахиннің бостандығын бір жылға шектеген. Белсендіге пробациялық бақылау тағайындалды. Сот оған екі жыл бойы әлеуметтік желіге кіруге және митингіге қатысуға тыйым салып, 100 сағат қоғамдық жұмыс істеуге міндеттеді.

21 қазанда Нұр-Сұлтан қаласының №2 Сарыарқа аудандық соты азаматтық белсенді Гүлмира Халықованы "тыйым салған ұйымның ақпаратын әлеуметтік желіде бөлісті" деп, бас бостандығын бір жылға шектеген. Бұдан бөлек, екі жыл қоғамдық-саяси қызметпен айналысуына және бұл мақсатта "әлеуметтік желілерді пайдалануға" тыйым салған. Бұған қоса, сот Халықованы 100 сағат қоғамдық жұмысқа жегу, одан "Зардап шеккендер қорының пайдасына" 25 250 теңге (65 долларға жуық) өндіріп алу жөнінде шешім шығарды.

Қуғындағы бизнесмен Мұхтар Әблязов құрған "Қазақстанның демократиялық таңдауы" қозғалысына 2018 жылы тыйым салынғаннан кейін бұл ұйымды қолдаған немесе қолдады деген күдікке ілінген ондаған белсендінің үстінен іс қозғалған. Кей заңгерлер ҚДТ қозғалысын "экстремистік ұйым" деп таныған сот шешімі қарама-қайшылыққа толы деп санайды.

  • 16x9 Image

    Сәния ТОЙКЕН

    Сәния Тойкен Азаттық радиосында 2007 жылдан бері жұмыс істейді. ҚазҰУ-дің журналистика факультетін бітірген. Республикалық  "Қазақстан пионері", "Жас Алаш" газеттерінде тілші болған. Қазақстан Республикасы Жекешелендіру жөніндегі комитетінің баспасөз хатшысы қызметін атқарған. Атырау облыстық "Ақ Жайық" газетінде  тілші, қазақ редакциясының редакторы, Маңғыстау облысында шығатын "Не хабар?!" апталығының редакторы болып жұмыс істеген. 

    Сәния Тойкен 2017 жылы журналист әйелдердің халықаралық қоры (IWMF) тағайындаған "Журналистикадағы батылдығы үшін" сыйлығын иеленді. Ол - бұл беделді сыйлықты алған алғашқы қазақстандық журналист.

ПІКІРЛЕР

AzattyqTV

Ақтөбеде жедел жәрдем қызметкерлері өтемақы алмағанына наразы
please wait

No media source currently available

0:00 0:03:01 0:00
XS
SM
MD
LG