Қазақстанда "Зорлау" бабымен сотталған төрт азаматқа химиялық кастрация қолдану үкімі орындалып жатыр. Процедура жарты жылға созылмақ. Бұл ақпаратты ішкі істер министрлігінің қылмыстық-атқару жүйесі комитетінің (ҚАЖК) ресми жауабына сүйенген Tengrinews агенттігі хабарлады. Агенттіктің жазуынша, заң бойынша кастрация туралы үкім қылмыскер жазасын өтейтін мекемеде орындалады.
"Павлодар, Шығыс Қазақстан, Ақмола облыстары және Шымкент қаласы қылмыстық-атқару жүйесі комитеті мекемелерінде сотталған төрт адамға аумақтық денсаулық сақтау органының медицина қызметкерлері тексерген соң химиялық кастрация түрінде мәжбүрлеп емдеу шарасы жүргізіледі" делінген комитет хабарламасында.
ҚАЖК қазіргі кезде жаза өтеу мекемелерінде химиялық кастрация қолдану туралы сот үкімі шыққан 11 адам қамауда отырғанын хабарлады. Құқықтық статистика комитетінің дерегінше, Қазақстанда екі жыл ішінде 15 адамға химиялық кастрация қолдану туралы сот үкімі күшіне енген.
Қылмыстық кодекске сәйкес, химиялық кастрация "кәмелетке толмағандарды зорлады" деген айып тағылып, қылмысы дәлелденген 18 жастан асқан тұтқындарға қолданылады.
Шілде айының соңында Шымкент қаласының қылмыстық істер жөніндегі мамандандырылған ауданаралық соты "кәмелет жасқа толмаған екі қызды зорламақ болды" деген айыппен сотталған ер адамға химиялық кастрация шарасын қолдануға үкім еткен.
Қазақстанда 2018 жылдың 1 қаңтарынан бастап химиялық кастрация жасау туралы заң күшіне енген.
Қарай отырыңыз: Кастрация педофилия мәселесін шеше ме? (Шілде, 2018 жыл).
ПІКІРЛЕР