Accessibility links

Прокурор Тәбәрікұлын алты айға соттап, Қазақстан аумағынан шығаруды сұрады


Қазақстан мен Қытай "шекарасын заңсыз кесіп өтті" деп айыпталған Тілек Тәбәрікұлы. Алматы облысы, 16 қаңтар 2020 жыл.
Қазақстан мен Қытай "шекарасын заңсыз кесіп өтті" деп айыпталған Тілек Тәбәрікұлы. Алматы облысы, 16 қаңтар 2020 жыл.

Прокурор "шекараны заңсыз кесіп өтті" деп айыпталған Шыңжаң қазағы 30 жастағы Тілек Тәбәрікұлын алты айға бас бостандығынан айырып, бес жылға дейін Қазақстан аумағынан шығаруды сұрады. Бұл ақпаратты сот залынан Азаттық тілшісі хабарлады.

Прокурордың сөзін естіген Тілек Тәбәрікұлы "тек Қытайға жібермеңіздерші" дегенді әрең айтты. Айыпталушының туыстары мен адвокат жылап жіберді.

Қорғау тарабы прокурордың айтқанына қарсы болып, Тәбәрікұлын үш айға соттап, Қытайға қайтармауды сұрады. Тілек Тәбәрікұлы да соттан өзін қайтармауды сұрады.

Судья кеңесу бөлмесіне кетті. Үкім 16 қаңтарда кешкі сағат 17.00-де шығады.

Шыңжаңда туған 30 жастағы Қытай азаматы Тілек Тәбәрікұлының үстінен Қазақстанның құқық қорғау органдары 2019 жылы тамыз айында қылмыстық іс қозғап, қазан айында ұстаған. Ол шамамен бір жарым-екі айдан бері Талдықорғандағы тергеу изоляторында қамауда отыр.

Айыптау тарабының айтуынша, ол 2018 жылы мамыр айында Қазақстан мен Қытай арасындағы "шекараны заңсыз кесіп өткен". Оның алдында Қазақстанда ықтиярхатпен жүрген ол 2017 жылы желтоқсан айында Қытайға "білім жетілдіру мақсатында" барып қайта алмай қалған. Қытайдың құқық қорғау органдары "белгісіз себептермен" құжатын алып, қайтармаған. Ол бірнеше айдан соң Қорғас бекетіне барып, реті келгенде Қазақстан жаққа қарай өтіп кеткен.

Қорғау тарабының айтуынша, полиция ықтиярхаты бар Тілек Тәбәрікұлын "Қазақстан азаматтығын алайын деп жүрген кезде" ұстаған. Ол Қытай азаматтығынан бас тартып, 2017 жылы қараша айында азаматтық алуға өтініш берген. Оның ықтиярхаты 2020 жылдың маусым айына дейін жарамды.

"Нағыз Атажұрт еріктілері" ұйымы өкілдерінің айтуынша, егер Қазақстан Тілек Тәбәрікұлын Қытайға қайтарса, оның үстінен ауыр баптар бойынша қылмыстық іс қозғалуы мүмкін, себебі ол жақта "шекараны заңсыз кесіп өткен азаматтар ауыр баптармен жазаланады".

Тілек Тәбәрікұлы "Қытайдағы қысымнан қашып, шекара бұзған" жалғыз қазақ емес.

2018 жылы тамызда "Қазақстан шекарасынан заңсыз өтті" деген айыппен Қытай қазағы Сайрагүл Сауытбайдың үстінен сот процесі жүрген. Қоғам назарын аударған сот шешімімен Сайрагүл Сауытбай шартты жазамен бостандыққа шыққан. Сотта Сайрагүл "Шыңжаңдағы лагерьде жұмыс істегенін, кейін қысымнан қашып, шекара бұзуға мәжбүр болғанын" айтқан. Кейін ол Қазақстаннан босқын мәртебесін ала алмай, Швецияға кеткен.

23 желтоқсанда Жаркент қаласындағы сот "шекара бұзды" деп айыпталған тағы бір Қытай қазағы Қайша Ақанды алты айға шартты жазаға кескен. Сот оны Қазақстанда қалдырған. "Шыңжаңдағы қысымнан қашып, Қазақстанға келген" Ақанның қолында қазір "пана іздеуші куәлігі" бар. Ол да Қазақстаннан босқын мәртебесін сұрап, арыз жазған.

Оқи отырыңыз: "Лагерь болмаса қашпас едім". "Шекара бұзған" қазақ шартты жазаға кесілді

Бұған дейін Қытайдың Шыңжаң өлкесінде тұратын этникалық қазақтар Қастер Мұсаханұлы мен Мұрагер Әлімұлы шекара бұзып, Қазақстанға өткен. Олар да "Шыңжаңдағы қысымнан қашып келгендерін" айтқан. 6 қаңтарда Шығыс Қазақстан облысында Мұсаханұлы мен Әлімұлының соты басталады.

Желтоқсан айының аяғында Қазақстанның ұлттық қауіпсіздік комитеті "Қазақ-қытай шекарасын заңсыз кесіп өттім" деп мәлімдеген этникалық қазақ Бағашар Мәлікұлына қатысты қозғалған қылмыстық іс қысқарғанын хабарлаған.


ПІКІРЛЕР

XS
SM
MD
LG