Accessibility links

Сапарбаев: Жәрдемақы алған 75 мың отбасы табысын жасырған


Премьер-министр орынбасары Бердібек Сапарбаев үкімет отырысында. Нұр-Сұлтан, 24 қаңтар 2020 жыл.

30 қаңтарда Нұр-Сұлтанда өткен үкімет пен мәжіліс депутаттарының кездесуі кезінде вице-премьер Бердібек Сапарбаев 2019 жылы атаулы әлеуметтік көмек алған 75 мыңдай отбасы табысын жасырған деп мәлімдеді.

- Өкінішке қарай былтыр осындай жағдайлар болды. Біз барлығын тексердік. 75 мың отбасы табысын жасырған. Қазіргі таңда 400-500 млн теңгені бюджетке қайтардық. Қазір біз былай айтып жатырмыз. Егер сол отбасы өз еркімен қайтарса, мәселе жоқ. Жергілікті органдар оны қайтарудың кестесін жасайды. Ал егер олай болмаса, онда сот арқылы өндіріліп алынады, - деді Сапарбаев.

Былтыр Қазақстан еңбек және халықты әлеуметтік қорғау министрлігі 70 мың отбасы атаулы көмек алу үшін табысын жасырған, 200-ке тарта қызметкер жауапкершілікке тартылды деп мәлімдеген.

Ақпарат құралдарында жарияланған дерек бойынша, атаулы әлеуметтік көмекті қайтару туралы талап көп балалы аналардың наразылығын туғызған. Олардың айтуынша, кейбір кезде жергілікті органдар жәрдемақыны тағайындау-тағайындамау мәселесін шешкен кезде тіпті аз ақшаның өзін есепке алған.

Өткен жылдың соңында жергілікті БАҚ отбасының табыс көлемі кедейлік шегінен 104 теңгеге асып кеткені үшін атаулы әлеуметтік көмек ретінде төленген ақшаны қайтаруға міндеттелген, Ақмола облысы, Зеренді ауданында тұратын көп балалы әкенің жұмыспен қамту орталығына атаулы әлеуметтік көмек ақшасына сатып алған заттарды апарып бергенін жазды.

Оқи отырыңыз: Шахтинск соты "артық АӘК алған" отбасының ісін қайта қарай бастады

Биыл ақпанда Нұр-Сұлтанда уақытша баспанада шыққан өрттен бір отбасының бес қызы қаза тапқан. Осыдан кейін елде көп балалы әйелдердің наразылығы күшейіп, олар биліктен жәрдемақыны өсіруді талап еткен. Осыдан соң үкімет тұрмысы төмен отбасыларда атаулы әлеуметтік көмекті көбейткен. Жаңа жылдан бастап үкімет көп балалы аналарға жаңа жүйе бойынша жәрдемақы төлей бастаған.

2020 жылдың 28 қаңтар күнгі жағдай бойынша, 80,5 мың отбасынан (412,9 мың адам, олардың 265,6 мыңы бала) атаулы әлеуметтік көмек тағайындау туралы өтініш түскен. Олардың 24 мыңына АӘК тағайындалған.

Қарай отырыңыз: "Қиналып кеттім". Жәрдемақыға құжат өткізе алмай жүргендердің шағымы (15 қараша 2019 жыл).

"Қиналып кеттім". Жәрдемақыға құжат өткізе алмай жүргендердің шағымы
please wait

No media source currently available

0:00 0:02:46 0:00

  • 16x9 Image

    Әсемгүл МҰХИТҚЫЗЫ

    2004 жылы Павлодар мемлекеттік университетін журналистика мамандығы бойынша тәмамдаған. "КТК-7"  телеарнасында тілші  (2003-2005), "Қазақстан-Павлодар" облыстық телеарнасында редактор, шеф-редактор (2005-2013), "Астана" телеарнасы Павлодар облысындағы меншікті тілшісі (2013-2019) болып жұмыс істеген. 2019 жылдан бері Азаттықтың Нұр-Сұлтан қаласындағы тілшісі.  

ПІКІРЛЕР

XS
SM
MD
LG