Accessibility links

Бас прокуратура: Үш адам "ұлтаралық араздық қоздыру" күдігіне ілінді


Жанжалдан кейінгі Масанчи ауылы. Жамбыл облысы, Қордай ауданы, 8 ақпан 2020 жыл.
Жанжалдан кейінгі Масанчи ауылы. Жамбыл облысы, Қордай ауданы, 8 ақпан 2020 жыл.

12 ақпанда Қордайдағы жанжалға байланысты мәлімдеме жасаған бас прокурордың орынбасары Болат Дембаев бірнеше адамның "ұлтаралық араздық қоздырдыру, күш қолдануға шақыру" күдігіне ілінгенін, олардың үстінен қылмыстық іс қозғалғанын хабарлады.

"Алматы қаласында 1990 және 1987 жылғы екі азамат Facebook желісінде ұлтаралық араздық қоздырып, күш қолдануға шақырды. 9 ақпанда 1983 жылғы Тараз тұрғыны WhatsApp желісі арқылы осыған ұқсас ақпарат таратқан" делінген мәлімдемеде.

Олардың үстінен Қылмыстық кодекстің 272-бап 3-бөлімі ("Жаппай тәртіпсіздік") бойынша сотқа дейінгі тергеу амалдары басталған.

Бас прокурордың орынбасарының айтуынша, қазір де әлеуметтік желіде "ұлтаралық тұрақтылыққа қауіп төндіретін" видеолар тарап жатыр және олардың арасында Қордайдағы оқиғаларға қатысы жоқ видеолар да бар.

7 ақпан кешке Жамбыл облысы Қордай ауданында қазақтар мен дүнгендер жанжалдасып, ресми дерек бойынша, 10 адам қаза тапты. 40-тан астам адам жараланған. Қордайдағы жанжал кезінде Қырғызстанмен шекараға жақын орналасқан, негізінен этникалық дүнгендер тұратын Масанчи, Сортөбе, Ауқатты ауылдарында, ресми мәлімет бойынша, 15 ғимарат пен 30-дан астам үй бүлініп, 23 көлік өртенді. Жанжалдан соң мыңдаған адам Қырғызстанға қашқан. Кейін үкімет Қырғызстанға кеткендер үйіне оралғанын хабарлады.

Кейбір сарапшылар Қордайдағы жанжал елдегі әлеуметтік жағдайдың, ауыл халқының тұрмысының төмендігін, Қазақстан билігінде мұндай қиын жағдайларды тез шешетін механизм қалыптаспағанын көрсетті деп санайды.

Видео: Түнгі ойран. Қордайдағы жанжалдың жай-жапсары (11 ақпан 2020 жыл).

Түнгі ойран. Қордайдағы жанжалдың жай-жапсары
please wait

No media source currently available

0:00 0:15:24 0:00

Қақтығыстың нақты себебі де ашық айтылмады. Ал жергілікті тұрғындардың сөзінше, бірнеше адам жолға таласып, көрші ауылдарда тұратын қазақтар мен дүнгендер жаға жыртысып қалған. Бұл төбелестен соң қазақтар жиналып, дүнгендер тұратын ауылдарға барған.

Халықаралық басылымдар этникалық қақтығыс деп сипаттаған жанжалдан кейін үкіметтік комиссия құрылып, Қордай ауданында төтенше жағдай жарияланды.

Қазақстан үкіметі жанжалға байланысты 25 қылмыстық іс қозғалғанын мәлімдеді. Бірақ қанша адам ұсталғанын ашып айтпай отыр. Тек жанжал кезінде 19 полицейдің зардап шеккенін хабарлады.

Қазақстан президенті Қасым-Жомарт Тоқаевтың өзі алғашында бұл дауды "бұзақылық сипаттағы жаппай төбелес" деп сипаттап, кейін "ұлтаралық жанжал тудырғандар" деп "арандатушыларды" айыптады.

Оқи отырыңыз: "Ұлтаралық келісімнің" қауқарсыз моделі. Қордайдағы жанжал нені аңғартты?​

ПІКІРЛЕР

XS
SM
MD
LG