Accessibility links

Түркістан облысы әкімінің есебіне барған журналист өзін полицияның ұстап әкеткенін хабарлады


Түркістан облысының әкімі Өмірзақ Шүкеевтің халыққа есеп беру жиыны. Түркістан, 14 ақпан 2020 жыл.

14 ақпанда Түркістан облысы әкімі Өмірзақ Шүкеевтің халыққа есеп беру жиынына барған бірнеше адамның ұсталғаны хабарланды. Олардың арасында журналист Амангелді Батырбеков те бар.

Амангелді Батырбековтің Азаттыққа айтуынша, есеп өтіп жатқан залға кірейін деп жатқанда Сарыағаш аудандық полиция басқармасының қызметкерлері белгісіз себеппен күш қолданып, полиция автобусына салып алып кеткен. Полиция өзінен бөлек тағы бірнеше адамды ұстаған.

Журналистің өзі бірнеше рет Facebook-та тікелей эфирге шығып, бірінде өзін полицияның автобустан шығармай отырғанын, тағы бірінде көлікпен белгісіз жаққа апара жатқанын хабарлады.

"Құрметті Тоқаев мырза! Бұл қандай мемлекет? Бұл не деген адам құқығын таптау? Мына тірлікті қолға алу керексіз. Бұл облыс әкімінің арнайы тапсырмасымен істелген дүние ме? Әлде мұны полиция істеп отыр ма? Бұны қалай түсінуге болады? Біз тұтқынбыз ма?" деді журналист видеожазбаларының бірінде.

14 ақпанда түс кезінде Азаттық тілшісі Сарыағаш аудандық полиция бөлімінің басшысы Әсет Ибрагимовке хабарласып, журналистің ұсталуына байланысты түсініктеме сұраған еді. Ол оқиғадан хабарсыз екенін, "жиналыста отырғанын" айтты. Ал Түркістан қалалық полициясы әзірге жауап бермеді.

Түскі бірлер шамасында полицияның Батырбековті Шымкентке апара жатқаны белгілі болды. Оның не үшін ұсталғаны белгісіз.

Амангелді Батырбеков - "Жала жабу" және "Қорлау" баптары бойынша істі болып, жақында ақталған тәуелсіз журналист. Ол аймақтағы жемқорлық сияқты қоғамдық маңызды мәселелерді көтеріп, мақала жазады. Қазір Түркістан облыстық сотында журналистің Facebook-тегі жазбасына байланысты "Қорлау" бабы бойынша тағы бір сот жалғасып жатыр.

Ресми БАҚ-тың хабарлауынша, әкімнің есеп беру жиынына 700 тұрғын қатысқан.

Оқи отырыңыз: Әкімнің блогерлермен кездесуінде белсенділер ұсталды
  • 16x9 Image

    Дилара ИСА

    Дилара - Азаттықтың Шымкенттегі тілшісі. 1986 жылы туған. Солтүстік Қазақстан мемлекеттік университеті мен Абай атындағы ҚазҰПУ-ді бітірген.

    "Жас Алаш" газетінде жұмыс істеген.

    Азаттықпен 2012 жылдан бері әріптес.

ПІКІРЛЕР

XS
SM
MD
LG