Accessibility links

Министр Абаев қатысқан талқылауда бейбіт жиын туралы заң жобасы сыналды


Бейбіт жиындар туралы заң жобасын талқылау сәті. Алматы, 17 ақпан 2020 жыл.

Алматыда бейбіт жиындар туралы жаңа заң жобасы талқыланды. Жиынға ақпарат және қоғамдық даму министрі Дәурен Абаев пен Алматы қаласы қоғамдық кеңесі өкілдері мен азаматтық белсенділер, барлығы 40 шақты адам қатысты.

Жиналғандар "Қазақстан Республикасында бейбіт жиындарды ұйымдастыру және өткізу тәртібі" туралы заң жобасы жайлы түрлі пікір айтты. Қазақстандағы адам құқығы мен заңды сақтау жөніндегі бюро директоры Евгений Жовтис заң жобасы халықаралық нормаларға сай емес деп санайды. Ол әсіресе, бейбіт жиын өткізу орнын белгілеу қате деді.

- Пикетке шыққан адам Сарыарқа кинотеатрының алдына немесе Ганди атындағы саябаққа бармайды (Алматы қаласы әкімдігі осы екі орынды бейбіт жиын өткізетін жер ретінде белгілеген - ред). Ол наразылығын еститін жерге, қоғам назары түсетін жерге барады, - дейді Евгений Жовтис.

Жовтис министр Абаевқа заң жобасын халықаралық сараптамаға жіберуді ұсынды.

Алматы қаласы қоғамдық кеңесінің мүшесі Марат Шибұтовтың сөзінше, заң жобасында жиын өткізгісі келгендерге артық талап пен кедергі көп. Ол митингі өткізуге қатысатын адам санына қарай рұқсат беру туралы бапты сынады.

Ал құқық қорғаушы Маржан Аспандиарова 1995 жылы қабылданған заңға президент Қасым-Жомарт Тоқаевтың мораторий жариялауын сұрады. Себебі "біз жаңа заңды талқылап отырғанда көптеген адам полиция тарапынан қысым көріп, түрмеге қамалып жатыр" деді ол. Заңгер соңғы жылдары бейбіт жиын өтетіні хабарланса, полиция белсенділерді оған дейін үйінен ұстап әкетуі әдетке айналғанын айтты.

Министр Абаевтың айтуынша, барлық ұсыныстар ескеріледі, заңға әлі де өзгерістер енгізуге болады.

Ақпарат және қоғамдық даму министрлігі "Қазақстан Республикасында бейбіт жиындарды ұйымдастыру және өткізу тәртібі" туралы заң жобасының тұжырымын осыдан бір апта бұрын таныстырған.
"Ашық үкімет" сайтында жарияланған тұжырымдамада 21 баптан тұратын заң жобасында елде бейбіт шеру, митинг және пикет өткізудің тәртібі, шараны ұйымдастырушы мен оған қатысушылардың құқықтары мен міндеттері, митингілер өткізуді қосымша регламенттеу жөніндегі жекелеген ережелер мен талаптар белгіленетіні жазылған.

  • 16x9 Image

    Манас ҚАЙЫРТАЙҰЛЫ

    1994 жылы 20 мамырда дүниеге келген. Әл-Фараби атындағы қазақ ұлттық университетінде филология мамандығы бойынша бакалаврды, Абай атындағы қазақ ұлттық педагогикалық университетінде магистратураны тәмамдаған. 

    "Дарабоз" журналында (2012-2014), "31 арнаның" жаңалықтар қызметінде (2015-2018) жұмыс істеген.

    Автормен оның Facebook парақшасында да пікірлесуге болады.

ПІКІРЛЕР

XS
SM
MD
LG