Accessibility links

22 ақпандағы митинг қарсаңында Нұр-Сұлтанда үш белсенді әйелді 5 тәулікке қамады


Ипотека борышкерлері тобының жетекшісі Қанағат Тәкеева (ортада) өзге де наразылармен бірге Ақордаға барар жолда тұр. Нұр-Сұлтан, 17 ақпан 2020 жыл.

Нұр-Сұлтан қаласында 18 ақпанда кем дегенде үш белсендіні жауапқа тартып жатыр, олар кеше, 17 ақпанда Қазақстан президентінің резиденциясына қарай өтуге тырысып, қарсылық акциясына шыққандар арасында болған.

Кеше түстен кейін ипотека борышкерлерінің жетекшісі Қанағат Тәкееваны, "әділетсіз сот" шешімдеріне наразы топ жетекшісі Санавар Закированы және олармен бірге қарсылық акциясына шыққан Алматы тұрғыны Мәдина Көкетаеваны полиция басқармасына алып кеткен. Оларды Ақордаға барар жолда, үкімет үйінің алдында ұстаған.

17 ақпанда сағат 21 шамасында Азаттық тілшісіне Нұр - Сұлтан қаласы Есіл аудандық полиция басқармасының бастығы Мадияр Айтуғанов "полиция ұсталғандармен әңгімелескенін, оларды үш сағаттан артық бөгемегенін" айтқан еді. Оның сөзінше, ұсталған үш белсенді әйелдің үшеуі де "қоғамдық орында тәртіп бұзғаны үшін" полиция басқармасына жеткізілген.

Сол күні Нұр - Сұлтан соты полиция рапорты бойынша Тәкееваны Қылмыстық кодекстің "Полицияға бағынбау" деген 667 бабымен айыптап бес тәулікке қамау туралы шешім шығарған.

Сот баспасөз қызметі Азаттыққа бүгін Есіл аудандық ішкі істер басқармасында судья Құралай Арқабаева Санавар Закирова мен Мәдина Көкетаеваға байланысты "көшпелі сот процесін" өткізетінін айтты. Адвокат Бауыржан Азановтың сөзінше, Закирова мен Көкетаева кешеден бері полиция басқармасында отыр, белсенді Қанағат Тәкееваны "көшпелі сот" түн жарымында соттаған. Ал адвокаттың өзін оларды қорғауға жібермеген.

Көп ұзамай Санавар Закирова мен Мәдина Көкетаеваны сот бес тәулікке қамау туралы шешім шығарғаны белгілі болды.

Дүйсенбі күні, таңғы 10:30 шамасында үкімет үйінің жанына жиналғандарды полиция қызметкерлері президент резиденциясына жақындатпай, жолын бөгеген болатын. Қарсылық акциясына шыққандар жоғары лауазымды тұлғалармен, соның ішінде Қазақстанның бұрынғы президенті Нұрсұлтан Назарбаевпен және оның қызы, парламент сенатының спикері Дарияға Назарбаевамен кезестіруді талап еткен.

Өткен аптада билік орындары әртүрлі айып тағып, 20-дан астам белсендіні жауапқа тартқан. Белсенділердің ұсталуын құқық қорғаушылар "22 ақпанда өтетін қарсылық акциясына биліктің дайындығы" деп бағалаған.


  • 16x9 Image

    Сәния ТОЙКЕН

    Сәния Тойкен Азаттық радиосында 2007 жылдан бері жұмыс істейді. ҚазҰУ-дің журналистика факультетін бітірген. Республикалық  "Қазақстан пионері", "Жас Алаш" газеттерінде тілші болған. Қазақстан Республикасы Жекешелендіру жөніндегі комитетінің баспасөз хатшысы қызметін атқарған. Атырау облыстық "Ақ Жайық" газетінде  тілші, қазақ редакциясының редакторы, Маңғыстау облысында шығатын "Не хабар?!" апталығының редакторы болып жұмыс істеген. 

ПІКІРЛЕР

AzattyqTV

Әкімдік солтүстіктен оңтүстікке көшкен бес балалы шаңырақты сотқа бермек
please wait

No media source currently available

0:00 0:04:49 0:00
XS
SM
MD
LG