Accessibility links

Наразылықтан кейін Кеңқияқтағы жұмысшылардың жалақысы көбейетіні хабарланды


Кеңқияқ кенішінің жұмысшылары. Ақтөбе облысы, 21 ақпан 2020 жыл. Оқырман жіберген сурет.

Ақтөбе облысындағы мұнай кеніштеріне сервистік қызмет көрсететін қытайлық "М-Техсервис" компаниясындағы жұмысшылар наразылығынан соң жалақы 15-33 пайызға көбейетін болды. Бұл ақпаратты Азаттыққа жұмысшылар хабарлады.

«Біз 21 ақпаннан бастап жұмысқа қайта кірістік» деді «М-Техсервис» компаниясының ұңғыма жөндеу бойынша операторы Қаржау Қалиев.

Алтыншы разряды бар оператор осыған дейін ай сайын 180-200 мың теңге жалақы алып жүрген.

- Жасым 61-де. Балаларым аяқтанды. Соның өзінде жалақым ас-судан артылмай, қиналып жүрдім. Балалы-шағалы, пәтерлерін несиеге алған жанымдағы жас жігіттер менен бетер қиналатын. Осы себепті кеше кеніштегі жұмысты тоқтатуға мәжбүр болдық. Ұзаққа созылған келіссөздерден соң жалақымыз көбейетін болды. Компания басшылары наразылық танытқан жұмысшыларды қудаламауға уәде берді, – дейді Қаржау Қалиев.

«М-Техсервис» компаниясының Ақтөбедегі бөлімшесі жұмысшыларының жалақысы 15-33 пайызға көбейетінін Ақтөбе облысы әкімінің орынбасары Қайрат Бекенов те растап отыр. 1 наурыздан бастап «М-Техсервис» компаниясының кеңседе отыратын қызметкерлерінің жалақысына - 15 пайыз, кеніште ауыр жұмыс істейтін жұмысшылар жалақысы 33 пайыз қосылады. Оның айтуынша, қазір компанияның Ақтөбедегі филиалында 500 жұмысшы істейді, олардың 90 пайызын - бұрғылаушы, инженер, операторлар сияқты "ауыр жұмыс істейтін" мамандар құрайды.

Қайрат Бекеновтің сөзінше, ол 20 ақпан күні кешке Кеңқияқтағы кенішке барып, наразы жұмысшылармен кездескен. Кеңқияққа жеткенше жол бойы «М-Техсервис» компаниясының Қытайдағы құрылтайшыларымен телефонмен келіссөз жүргізіп, жұмысшылар талабын жеткізген.

- «М-Техсервис» мұнай өндірмейді. Сервистік қызмет көрсететін компания. Экономикалық мүмкіндіктері шектеулі болғандықтан компания жұмысшылар талабын бірден орындай алмаған. Осыдан кейін облыс басшысы Оңдасын Оразалин «М-Техсервис» компаниясына тапсырыс беруші ірі өндіріс «СНПС-Ақтөбемұнайгаз» акционерлік қоғамымен келіссөз жүргізіп, 2020 жылғы наурыз айынан бастап тарифтік жоспарды 8-10 пайызға өсіруге қол жеткізді. Яғни, сервистік қызметке төленетін тарифті көбейту арқылы жұмысшылар талабын орындау мүмкін болып отыр-дейді Қайрат Бекенов.

Бейсенбі яғни, 20 ақпанда Ақтөбе облысы Кеңқияқ кенішінде "М-Техсервис" компаниясының елуге тарта жұмысшысы таңертеңнен бастап жұмысқа шықпай, жалақыны 33 пайызға дейін көбейтуді талап еткен болатын. Жұмысшылар наразылық акциясын өткізбей тұрып, компанияның кәсіподақ комитеті мен басшыларына өздерінің талаптарын жеткізген. Бірақ мәселе шешілмеген.

"М-Техсервис" - 2003 жылы Ақтөбе қаласында тіркелген қытайлық мекеме. Ол "Маңғыстаумұнайгаз" игеріп жатқан Маңғыстау облысындағы Бозащы және Жетібай, "СНПС-Ақтөбемұнайгаз" компаниясының Кеңқияқ кенішіндегі мұнай ұңғымаларын жөндеу бойынша қызмет көрсетеді.

  • 16x9 Image

    Жаңагүл ЖҮРСІН

    Жаңагүл Жүрсін - Азаттықтың Ақтөбе облысындағы тілшісі. 1975 жылы 16 желтоқсанда дүниеге келген. 1996 жылы Қ.Жұбанов атындағы Ақтөбе университетін бітірген. Еңбек жолын Ақтөбе облыстық телевидениесінен бастап, әр жылдары осы өңірдегі түрлі БАҚ-та тілші, редактор, бас редактор қызметін атқарған. Азаттықпен 2011 жылдан бері әріптес.

ПІКІРЛЕР

AzattyqTV

XS
SM
MD
LG