Accessibility links

Оралда Грибоедов өлеңін оқыған белсендіге айыппұл салды


Азаматтық белсенді Әлия Әбілқайырова сот залында. Орал, 5 наурыз 2020 жыл.

5 наурызда Орал қаласының әкімшілік соты белсенді Әлия Әбілқайырованы "ұсақ алаяқтықпен айналысты" деп танып, 9 мың теңге (шамамен 25 доллар) көлемінде айыппұл салды. Өткен жылы желтоқсан айында апелляциялық сот шешімінен кейін (Әбілқайырова әділетсіз шешім деп бағалайды) белсенді орыс жазушысы Александр Грибоедовтың шығармасынан үзінді оқыған еді. Әкімшілік істің қозғалуына осы жайт түрткі болған. Белсендінің айтуынша, сотта отырған адамдар қол шапалақтаған, ал одан кейін тәртіп бұзуға қатысты арыз-шағым түспеген.

19 желтоқсанда облыстық сотта Әлия Әбілқайырованың ісі бойынша апелляциялық сот отырысы өткен еді. Азаматтық белсенді "полиция талабына бағынбау" ісі бойынша әкімшілік сот шешімімен келіспей шағым түсірген. Апелляциялық сот шешімді өзгеріссіз қалдырды.

- Сот шешімін естіп, қатты күйзелдім. Сот залынан шығып, басымдағы ақ орамалды шешіп тастадым. Жақында анам қайтыс болып, тағып жүрген едім. "Масқара" деп айқайлап, Чацкийдің монологын оқи бастадым, - деді 5 наурыз күнгі сот кезінде Әлия Әбілқайырова. Бұдан соң тағы да шығармадан үзінді оқыды.

Іс материалдарына сәйкес, Әлия Әбілқайырова "тәртіп бұзып, сот приставтарына тіл тигізген". Ал Әбілқайырова сот тәртібін бұзбағанын, приставтармен мүлде тілдеспегенін айтады.

- Билікті жақтайтын сот және құқық қорғау орган жүйесіне қарата "Масқара!", "Қарғыс атсын" деп айтқаным рас. Бірақ жекелеген адамдарға тіл тигізген жоқпын, - деді ол сотта.

Белсендінің қорғаушысы Руслан Шағатаев қылмыс құрамы жоқ болғандықтан және хаттама толтыру кезінде заң бұзылғандықтан соттан әкімшілік өндірісті тоқтатуды талап етті. Шағатаевтың пікірінше, оның қорғауындағы азамат "ұсақ алаяқтық" деп атайтындай әрекет жасамаған. Адвокаттың сөзіне қарағанда іс материалдарында сот залынан түсірілген видеожазба да бар, белсендінің соттағы қимыл-әрекетін содан көруге болады.

Судья Құрмашев Әлия Әбілқайырованы кінәлі деп тауып, бес айлық есептік көрсеткіш көлемінде (13 255 теңге) айыппұл салды, бірақ отбасындағы жағдайды ескеріп айыппұл көлемін 30 пайызға қысқартты.

Оқи отырыңыз: Митингілерге қатысқан Орал тұрғынын "полицейге бағынбады" деп айыптады

ПІКІРЛЕР

AzattyqTV

XS
SM
MD
LG