Accessibility links

Алматыда кейінгі күні вирус жұқтырған 27 адамның бәрі - медқызметкер


Коронавирустен қорғаныс киіміндегі дәрігерлер. Көрнекі сурет.
Коронавирустен қорғаныс киіміндегі дәрігерлер. Көрнекі сурет.

Соңғы тәулікте Алматы қаласында 27 адам коронавирус жұқтырғаны анықталды, барлығы медицина қызметкерлері. Бұл ақпаратты Алматы қаласының қоғамдық денсаулық сақтау басқармасының мәліметіне сүйеніп, биліктің Қазақстандағы коронавирус жайлы мәліметтерін тарататын coronavirus2020.kz жариялады.

Ақпаратқа қарағанда, коронавирус жұқтырған дәрігерлердің 21-і - әйел, алтауы - ер адам. Әйелдердің біреуі - жүкті. Екі адамның жағдайы полисегментті пневмонияға байланысты - ауыр, қалғандарының жағдайы қанағаттанарлық.

Коронавирус анықталған 20 қызметкер шұғыл медициналық көмек көрсетіп жатқан қалалық орталық клиникалық аурухана қызметкерлері. Тағы 7 адам балалар жұқпалы аурулар ауруханасында жұмыс істейді.

«Осы факті бойынша қазір эпидемиологиялық тексеру жүргізіліп жатыр. Барлық қалалық клиника ішінде эпидемияға қарсы іс-шаралар күшейтілді» дейді Алматы қалалық қоғамдық денсаулық сақтау басқармасы.

13 сәуірдегі ақпарат бойынша Алматыда коронавирус жұқтырғандар 172-ге жеткен. 49 адам сауығып, екі адам қайтыс болған.

Коронавирус жұқтырғандар Қазақстанда осыдан тура бір ай бұрын тіркелген, 13 сәуір 14.50-дегі мәлімет бойынша 979 адамға жетті. 110 азамат дерттен жазылып, 12 адам қайтыс болды.


ПІКІРЛЕР

XS
SM
MD
LG