Accessibility links

Шымкентте полиция 20-дан астам белсендіні ұстады, арасында Ерлан Балтабай да бар


Полиция қызметкерлері "митинг орны" ретінде белгіленген жерді күзетіп тұр. Шымкент, 6 маусым 2020

6 маусымда күндіз Шымкентте полиция "митинг орны" ретінде белгіленген Ордабасы алаңын қоршап, алаңға бара жатқан жолда 15 шақты адамды ұстады. Азаттық тілшісінің хабарлауынша, адамдар ешқандай ұран көтермеген.

Ұсталғандар арасында кәсіподақ белсендісі Ерлан Балтабай да бар. Ол полиция қызметкері тұрғындардың бірін ұстап жатқан кезде араша түспек болған. Ұсталғандар Абай, Әл-Фараби аудандық ішкі істер бөлімшесіне әкетілген.

Түскі сағат 12-ге таман полиция белсенді Мұрат Аштаев, Нұрлан Әбілдаев және тағы бірнеше адамды ұстап әкетті. Белсенділердің бірі "Шал, кет!", "Диктатураға орын жоқ!", "Жер сатылмасын" деген ұран көтерді. Полиция қызметкерлері "неге ұстап жатсыңдар?" деп айқайлаған аялдамада тұрған адамдарды да көлікке отырғызды.

Оқиға орнында қолшатыр ұстаған белгісіз екі ер адам Азаттық тілшісінің жұмысына кедергі келтірді. Олар журналистің камерасын қолшатырмен жауып, полицияның адамдарды ұстау сәтін түсірткізбеуге тырысты. Бұған қоса, Шымкент қалалық ішкі істер департаментінің баспасөз қызметінде істейтін ер адам Азаттық тілшісінің әрекетін үздіксіз видеоға түсірумен болды.

Сенбі, 6 маусымда Шымкенттен бөлек, Алматы мен Нұр-Сұлтанда да полиция "митинг орнында" адамдарды ұстаған. Азаттық тілшілері оқиға орнынан тікелей эфирде хабар таратты.

Түстен кейін бір топ белсенді жиналып, 4 маусым күні сотталып қамауға алынған төрт белсенді жатқан түрмеге барып наразылық білдірді. Олар белсенділерді қудалауды тоқтатуды, оларды босатуды, жердің сатылуына қарсы екенін айтты.

Бұған дейін тіркелмеген "Демократиялық партия" және шетелде тұрып жатқан экс-банкир, оппозициялық саясаткер, билікті сынаушы Мұхтар Әблязов жақтастарын 6 маусымда митингіге шығуға шақырған болатын.

Митингілер қарсаңында әр аймақта белсенділерге қысым күшейіп, ұстала бастаған. Бас прокуратура митингілердің заңсыз екенін айтып, жұртты наразылыққа шықпауға шақырған.

Осыған дейін халықаралық ұйымдар Қазақстан билігі карантинді пайдаланып, адам құқығын шектеп жатыр деп мәлімдеген.

  • 16x9 Image

    Дилара ИСА

    Дилара - Азаттықтың Шымкенттегі тілшісі. 1986 жылы туған. Солтүстік Қазақстан мемлекеттік университеті мен Абай атындағы ҚазҰПУ-ді бітірген.

    "Жас Алаш" газетінде жұмыс істеген.

    Азаттықпен 2012 жылдан бері әріптес.

ПІКІРЛЕР

XS
SM
MD
LG