АҚШ қорғаныс министрлігі биыл Украинаға USAI (Ukraine Security Assistance Initiative) бастамасы аясында 250 млн доллар көлемінде әскери көмек беретінін растады.
Пентагонның бейсенбі күні таратқан хабарламасында бұл қаражаттың жартысы әскери саладағы реформалардың жүзеге асу тиімділігіне байланысты болғаны айтылған. Ондағы ақпаратқа сәйкес, Украинаға бұл қаражат Ресей агрессиясына төтеп бере алуы үшін қосымша дайындық, жабдық және кеңес алу үшін беріледі.
Пентагон хабарламада Украинаны "Ресеймен стратегиялық бәсекелестіктің алдыңғы қатарындағы маңызды әріптес" деп атаған. Онда сонымен бірге АҚШ әдеттегідей Украинаның егемендігін және халықаралық қауымдастық мойындаған территориялық тұтастығын қолдайды делінген.
"РБК-Украина" сайтының жазуынша, Украинаның қорғаныс министрлігі елдің қорғаныс қабілетін арттыруға көмектескені үшін америкалық әріптестеріне алғыс айтқан. Киев украин үкіметінің қауіпсіздік және қорғаныс саласын реформалау және НАТО стандарттарына сәйкестендіруге басты назар аударып отырғанын айтқан.
Мәскеу Украинаға агрессия көрсеткенін және Донбастағы жағдайды ушықтырғанын ылғи жоққа шығарады.
ПІКІРЛЕР