Accessibility links

Нұр-Сұлтанда белсенді Санавар Закированың жақтастары пикетке шықты


Белсенді Санавар Закироваға қатысты қылмыстық істі тоқтатуды талап етіп тұрған Алтын Жандосова (сол жақта) мен Зейнегүл Құтпанбетова. Нұр-Cұлтан, Қазақстан, 29 маусым 2020 жыл.

29 маусымда Нұр-Cұлтанда Жоғарғы соттың алдына Алматыда соталды тыңдауы өтіп жатқан белсенді Санавар Закированың екі жақтасы келіп, пикет өткізді.

Закирова "8 наурызда "Нұр Отан" партиясының Тамара Шакированың қызына әдейі денсаулығына зиян келдірді" деген айып тағылып, сол іс бойынша соталды тыңдауы басталды.

Нұр-Сұлтанда пикетке шыққан зейнеткерлер Алтын Жандосова мен Зейнегүл Құтпанбетова белсенді Санавар Закироваға қатысты қозғалған қылмыстық істі заңсыз деп санайтынын айтып, жоғарғы сот төрағасы Жақып Асановтың отставкаға кетуін талап етті.

– Біз Санавар Закированың ісін қарап отырған судья Залина Махарадзе (белседі Әлнұр Ильяшевтің бас бостандығын үш жылға шектеу туралы үкім шығарған судья – ред.) әділетсіздік танытып отыр деп санаймыз. Мұндай жалған айыптаулармен болған істер отыз жылдың ішінде өте көп болды. Олардың бәрін ақтау керек. Соттары істі әділ қарамаса Жақып Асанов орнынан кетсін, – дейді өзін “Закированың өкілімін” деп атаған Алтын Жандосова.

Оның сөзін 65 жастағы Зейнегүл Құтпанбетова да қоштады.

51 жастағы Санавар Закироваға қатысты істің Алматыдағы соталды тыңдауы 20 маусымда басталған. Белсенді өзінің “Нұр Отан” партиясы мүшесіне қатысты жазған арызын құқық қорғау орындары өзіне қарсы қолданып отыр деп санайды.

– Мен істі қысқартуды талап етіп отырмын. Адвокаттарыммен бірігіп судьяға қатысты төрт мәрте наразылық білдірдім, 15-тен астам өтініш түсірдім, бірде-бірі қанағаттандырылмады, – дейді Санавар Закирова.

Белсенділердің талабына қатысты жоғарғы соттан ешкім шықпады. Соттың күзет қызметі соттардың қашықтан жұмыс жасап жатқанын айтып, кеңсеге арыз тапсыруды ұсынды.

Наразылық білдірген зейнеткерлерді бірнеше полицей мен арнайы жасақ сырттай бақылап тұрды, тиіспеді.

2019 жылы қазанда “Нұр Отан” партиясы “Наше право” деп аталатын саяси партия құрмақ болған үш белсендіні – Санавар Закированы, Әлнұр Ильяшевті және Марат Тұрымбетовті сотқа берген. Алматы қаласы Жетісу аудандық сотына жүгінген партия белсенділерді “Нұр Отан” партиясы туралы жалған ақпарат таратты деп айыптады. Билік белсенділердің партиясын тіркеуден бас тартқан соң, олар “партиямызды тіркемеуге “Нұр Отан” партиясы кінәлі” деген болатын. Билік партиясы осы сөзді жалған ақпаратқа теңеген. “Нұр Отан” атынан шағымға партия мүшелері Тамара Шакирова, Ержан Медеуов, Дидар Акулов және Разия Бахибекова қол қойған.

Сот “Нұр Отан” партиясы мүшелерінің арызын қанағаттандырып, талапкердің пайдасына үш белсендіден 6 миллион теңге өндіру туралы үкім шығарды. Санавар Закирова мен оны қолдаушы топ “Нұр Отанның” ақшасын төлеу үшін астанадағы мешіт алдына шығып “садақа” сұраған.

Санавар Закирова 2020 жылы 8 наурызда “Нұр Отан” партиясы атынан шағым түсіргендерге барып, олардан өзінің сот шешімін орындай бастағаны туралы қолхат алмақ болған. Белсенді Шакировадан басқа арызданушылар мекенжайларын дұрыс көрсетпей, телефон нөмірлерін қалдырмағанын, ал Шакированың өзімен жанжалдасып қалғанын айтады. Осыдан кейін Санавар Закирова "денсаулыққа әдейі орта дәрежеде зиян келтірді" айыпталып, үстінен қылмыстық іс қозғалған.

  • 16x9 Image

    Сәния ТОЙКЕН

    Сәния Тойкен Азаттық радиосында 2007 жылдан бері жұмыс істейді. ҚазҰУ-дің журналистика факультетін бітірген. Республикалық  "Қазақстан пионері", "Жас Алаш" газеттерінде тілші болған. Қазақстан Республикасы Жекешелендіру жөніндегі комитетінің баспасөз хатшысы қызметін атқарған. Атырау облыстық "Ақ Жайық" газетінде  тілші, қазақ редакциясының редакторы, Маңғыстау облысында шығатын "Не хабар?!" апталығының редакторы болып жұмыс істеген. 

    Сәния Тойкен 2017 жылы журналист әйелдердің халықаралық қоры (IWMF) тағайындаған "Журналистикадағы батылдығы үшін" сыйлығын иеленді. Ол - бұл беделді сыйлықты алған алғашқы қазақстандық журналист.

ПІКІРЛЕР

XS
SM
MD
LG