Accessibility links

"Субботажға" шығып қамалғандарға 6 маусымдағы акция үшін тағы жаза қосты


Көрнекі сурет.
Көрнекі сурет.

Алматы қаласының мамандандырылған ауданаралық әкімшілік соты 13 маусымда "субботаж" атты шеруге қатысқаны үшін әкімшілік жауапқа тартылып, қазір қамауда жатқан төрт белсендіге тағы да әкімшілік қамау жазасын беру туралы шешім шығарды.

Сот 18 маусымда 15 күнге қамалған Ноян Рақымжановқа 6 маусымда "субботажға" шыққаны үшін тағы 15 тәулік қамау жазасын тағайындады. Дәл осындай айыпты мот қазір 15 күндік әкімшілік қамауда жатқан үш белсендіге – 44 жастағы Абайбек Сұлтанов, 47 жастағы Асхат Жексебаев пен 37 жастағы Қайрат Қылышевке да тағып, олардың бұрынғы жаза мерзіміне тағы бес тәулік қосты.

Осыдан бір апта бұрын сот "субботажға" қатысқаны үшін 15 тәулікке әкімшілік қамауға алынған алты адамның апелляция шағымын қанағаттандырудан бас тартқан. Олардың үшеуі - Асхат Жексебаев, Бақдәулет Әлібеков пен Абайбек Сұлтанов Алматы облысы Іле аудандық уақытша ұстау изоляторында, ал Ермек Қазиев, Қайрат Қылышев пен Марат Құрбанов — Алматы облысы Қарасай аудандық уақытша ұстау изоляторында жазасын өтеп жатыр.

13 мамырда кешке жүз шақты адам Алматының орталығындағы Панфилов көшесінде жаяулар жолымен шерумен жүріп өткен еді. "Субботаж" атты серуенге ұқсас шара кезінде жиналғандар музыкалық аспаптарда ойнап, кейбірі билеген. Оған қатысушылар "Белсенділер - экстремист емес!" және "Алға, Қазақстан!" деп айқайлаған.

"Субботаж" шарасына жұртты шетелде тұрып жатқан оппозициялық саясаткер, экс-банкир, Мұхтар Әблязов шақырған. Осындай акциялар сол күні Нұр-Сұлтан мен Шымкент қалаларында өткен.

13 маусымдағы "субботаждан" кейін үкімет Қазақстандағы "эпидемиологиялық ахуалдың күрделі екенін ескере отырып", маусым айындағы кейінгі екі сенбі-жексенбі күндері елде "қосымша шектеулер" жариялады: қоғамдық орындар, орталық көше, саябақтар жабылды.

Қазақстанда пандемия кезінде қабылданған "Бейбіт митинг туралы" жаңа заң билікке ескертпей наразылыққа шыққандарға жазаны күшейткен. Халықаралық құқық қорғау ұйымдары Қазақстан билігі қабылдаған "Бейбіт митинг туралы" жаңа заңды шектеулер көп деп сынаған.

  • 16x9 Image

    Қазис ТОҒЫЗБАЕВ

    Қазис Тоғызбаев 2008 жылғы қыркүйектен бастап өмірінің соңына, яғни 2021 жылғы 28 ақпанға дейін Азаттықтың Алматыдағы тілшісі ретінде еңбек етті. Азаттыққа дейін оппозициялық "Сөз" және "Азат" газеттерінде, kub.info сайтында тілші болған.

ПІКІРЛЕР

XS
SM
MD
LG