Accessibility links

Беларусь ІІМ: 3 мың адам ұсталды, 100 адам жарақаттанды, адам өлімі жоқ


Жолды жапқан арнайы жасақ өкілдеріне сөйлеп тұрған наразы тұрғындардың бірі. Минск, 9 тамыз 2020 жыл.

Беларусь ішкі істер министрлігі мемлекеттік экзит-полл нәтижесі жарияланғаннан кейін тұтанған президент Александр Лукашенкоға қарсы наразылық акциясы кезінде ұсталғандар мен зардап шеккендер туралы ресми мәлімет жариялады.

ІІМ мәліметінше, 10 тамызға қараған түні елдің 33 қаласында наразылық акциясы өткен, рұқсат етілмеген акцияға қатысқаны үшін шамамен 3 мың адам ұсталған, басым бөлігі – Минск емес, басқа қала тұрғындары.

Ведомствоның баспасөз қызметінің хабарлауынша, милиция қызметкерлерімен қақтығыс кезінде 50-ден астам азамат, 39 қауіпсіздік қызметінің өкілі жарақаттанған. Кейбірі аухураханаға түскен.

ІІМ өкілдері Минск мен Пинск қаласында жиналғандардың "агрессия көрсеткенін" айтып, оларға "қару қолданылмағанын" да атап өткен. Қалған құралдар туралы айтылмаған. Наразылық акциялары кезінде түсірілген суреттер мен видеоларға қарап, милицияның көзден жас ағызатын газ, құлақ тұндыратын граната, резеңке оқ қолданғанын көруге болады.

Бұған дейін "Весна" құқық қорғау орталығы Минскіде автозак қағып кеткен бір адамның қайтыс болғанын хабарлаған еді. Ал ІІМ хабарламасында қақтығыс кезінде адам шығыны болмады деп жазылған.

Көшеге шыққан Беларусь азаматтары қазіргі президент Александр Лукашенко сайлауда жеңді деп таныған президент сайлауының алдын ала қорытындысымен келіспей, қарсы шыққан еді. Оппозиция дауыс беру қорытындысы бұрмаланды деп санайды. Лукашенконың сайлау кезіндегі басты қарсыласы Светлана Тихановская сайлау қорытындысын мойындамайтынын айтып, билікті диалогқа шақырған.

ПІКІРЛЕР

XS
SM
MD
LG