Қазақстан "ресейлік вакцина алға шығып кеткен соң" оны сатып алу туралы келісім жасасқан

Денсаулық сақтау министрлігінің ресми өкілі Бағдат Қожахметова 18 қыркүйектегі брифингте Қазақстанның Ресеймен ғана коронавирус вакцинасын сатып алу туралы келісім жасасқанын "ресейлік екпе басқалардың алдына шығып кетті" деп түсіндірді.

- Бұл, бәлкім, ресейлік вакцина басқа екпелермен салыстырғанда клиникалық сынақ бойынша алға шығып кеткенімен байланысты шығар. Ресейлік вакцинаның нәтижесі сынақтың төртінші кезеңіне жақын қалды, - деді ол.

Қожахметов Қазақстан сертификациядан бірінші өткен және жаппай сатылымға шығатын вакцинаны алу үшін кез келген елмен келісім-шарт жасасуға дайын деп сендірді.

- Қытай бола ма, Ресей бола ма, Қазақстан бола ма маңызды емес. Әрине, біз отандық вакцинаға басымдық береміз. Бастысы – шұғыл шара қабылдау, - деді министрлік өкілі.

Бірнеше күн бұрын қазақстандық басылымдар Дүниежүзілік денсаулық сақтау ұйымы Қазақстанда сынақта өтіп жатқан екінші вакцинаны кандидаттар тізіміне қосқанын хабарлады. Қожахметов брифингте қоғамды "қазақстандық ғалымдарға сенуге" шақырды.

— Сенейік, бақылап көрейік… Бұл – халықаралық сертификация. Біздің ғалымдардың осыған жеткеніне қуаныштымын, - деді ол.

• Қазір әлемде 100-ден астам коронавирусқа қарсы вакцина жасалып жатыр. Covid індетіне қарсы екпені алғаш тіркеген елдердің бірі Ресей қазан айында жаппай егу бағдарламасын жүзеге асыруды жоспарлап отыр. 12 тамызда Қазақстан президенті Қасым-Жомарт Тоқаев қыркүйек айында Ресейге вакцина сатып алу бойынша делегация жіберетінін хабарлаған. Бұл қоғамда түрлі пікір туғызған. Денсаулық сақтау министрлігі сынақтың барлық кезеңі аяқталмайынша препаратты алмайтынын мәлімдеген.
• 24 тамызда Қазақстан денсаулық сақтау министрі Алексей Цой арнайы делегациямен Мәскеуге барған. Делегация Мәскеуде ресейлік вакцина "дайын болып, халықаралық сертификациядан өткенде" сатып алу туралы келісім жүргізетіні хабарланған.
• 26 тамызда Нұр-Сұлтан мен Мәскеу ресейлік вакцинаны алу жөнінде келісімге қол қойғаны белгілі болды. Ресейлік вакцинаның финалдық сынағы әлі аяқталған жоқ.
• Батыс елдері мен ДДСҰ ресейлік вакцина барлық сынақтан өтпеді деп алаңдаушылық білдірген. Бірақ бұған қарамастан Мәскеу 8 қыркүйекте вакцинаның алғашқы партиясын айналымға жіберді.
• Қыркүйектің басында денсаулық сақтау министрінің орынбасары Марат Шоранов ресейлік вакцина тәуекел тобына енетін адамдарға салуға келмейді деген.