Accessibility links

Ресейдегі наразылық: Ұсталғаны расталғандар 3435 адамға жетті


Полиция жасағының шерушіні ұстап әкетуі. Санкт-Петербург, 23 қаңтар 2021 жыл.
Полиция жасағының шерушіні ұстап әкетуі. Санкт-Петербург, 23 қаңтар 2021 жыл.

Кремль сыншысы Алексей Навальныйды босатуды талап еткен митингілер кезінде ұсталғаны расталғандар саны 3435-ке жетті. Бұл туралы "ОВД-Инфо" басылымы хабарлады.

Басылымның мәліметінше, ұсталғандардың көбі Мәскеу (1360) мен Санкт-Петербург (523) үлесінде. Новосибирскіде 97, Воронежде 92, Қазанда 92, Нижний Новгородта 90 адамның ұсталғаны анықталған.

Басылым ұсталғандар санын жиі жаңартып жатыр. Соған қарағанда бұл ақырғы сан болуы ықтимал.

23 қаңтар күні Ресейдің жүздеген қаласында оппозициялық саясаткер Алексей Навальныйды босатуды талап еткен наразылық акциялары өтті.

Навальный 17 қаңтар күні Берлиннен Мәскеуге оралған бойда қамауға алынған. 18 қаңтар күні Мәскеу соты оны 30 тәулікке қамау туралы үкім шығарды. Осы мерзім аралығында оның шартты жазасын қамауға ауыстыру туралы отырыс өтуі керек. Әңгіме 2014 жылғы "Ив Роше" ісі жөніндегі сот шешімі төңірегінде болып отыр. Навальный жақтастары шартты жазаның өткен жылдың соңында аяқталғанын айтады.

23 қаңтар күні болған митингілерге Навальныйдың өзі шақырған. Ол бұл үндеуін 18 қаңтар күнгі сот отырысының алдында жолдаған. Кейінірек оның штабы нақты күнді хабарлады.

Митинг күні және оның қарсаңында Ресей билігі Навальный жақтастарын ұстап, тінтіп, оларға деген қысымды күшейтті.

44-жастағы Навальный Ресей президенті Владимир Путиннің ең басты қарсыласы саналады. Өткен жылы тамыз айында оппозициялық саясаткер Томскіден Мәскеуге ұшып бара жатып, есінен танып қалды. Екі күннен соң ес-түссіз күйі Германияға жеткізілген Навальный Мәскеуге оралғанға дейін сол емделген. Германия үкіметі Навальныйдың "Новичок" дейтін жүйке жүйесін сал ететін умен уланғанын мәлімдеді. Оны ресми Берлиннің өтінішімен бөлек талдау жүргізген үш тәуелсіз зертхана растаған.

Навальный қамауға алынғаннан екі күн өткен соң оның штабы "Путиннің сарайы" дейтін екі сағаттық зерттеу фильмін жариялады. Youtube желісінде жарияланған зерттеу осы уақытқа дейін 77 миллион көрілім жинап үлгерген.

ПІКІРЛЕР

XS
SM
MD
LG