Израиль тарабының соққысынан кейін Газа секторында коронавирус анықтайтын жалғыз зертхана істен шықты. Бұл туралы The Times of Israel басылымы жазды.
ХАМАС өкілдеріне сүйенген басылымның жазуынша, соққының салдарынан Газа секторындағы Әл-Рималь клиникасы ішінара қираған. Зертхана осы клиникада орналасқан. ХАМАС-тың ресми өкілдерінің айтуынша, денсаулық сақтау министрлігі мен Қызыл Ай ұйымының Катардағы басқармасы ғимараты да бүлінген.
Газаның денсаулық сақтау вице-министрі Юсеф Әбу әл-Риш ақпарат құралдарына министрлік қызметкерлерінің жараланғанын, кейбірінің жағдайы ауыр екенін хабарлады.
Дүниежүзілік денсаулық сақтау ұйымының (ДДСҰ) мәліметінше, Газа секторында коронавирус тесті оң шыққан азаматтар өте көп (28 пайызы), бұл көрсеткіш бойынша Газа әлемде алдыңғы орындарда тұр. Мұнда ауруханаларда орын жоқ. The Times of Israel басылымының жазуынша, Газада 103 мың адамның ПТР-тесті оң шыққан, коронавирустан 930-дан астам адам қайтыс болған.
Палестина ақпарат құралдары сейсенбі күні Израиль қорғаныс армиясының Газа секторына жаппай соққы бергенін хабарлады. ХАМАС-тың жағалаудағы кемелері де атқылауға ұшыраған.
17 мамырда Washington Post АҚШ-тың Израильге 735 млн долларға жоғары дәлдікпен тигізетін қару сатуды мақұлдағанын хабарлаған.
Аймақта жағдай ушыққалы бері (10 мамыр) Палестина билігінің мәліметінше, Газа секторында 192 адам қаза болған, 58-і – бала. Израиль әскері ХАМАС-тың әскери нысандарын тұрғын үйлермен қатар салып, бейбіт тұрғындарды "қалқан" ретінде пайдаланып отыр деп айыптаған.
ПІКІРЛЕР