Accessibility links

Жаңаөзен абақтысында азаптаудан мерт болған Кенжебаевтың ұлының өлімі: Белсенділер мен полиция ақпараты


Ақтау қаласы. Көрнекі сурет.
Ақтау қаласы. Көрнекі сурет.

Жаңаөзен оқиғасы кезінде абақтыда алған соққы мен азаптаудан мерт болған Базарбай Кенжебаевтың ұлы Ғалымжан Кенжебаев 27 маусымда Жаңаөзенде қайтыс болған. Оның өліміне қатысты белсенділер мен полиция қарама-қайшы ақпарат таратты.

Ғалымжан Кенжебаевтың өлімі туралы ақпаратты БАҚ өкілдеріне бірінші болып саяси белсенді Жанболат Мамай хабарлады. Ол 1 шілде күні Facebook парақшасында "Кенжебаевтың жұмбақ өліміне" қатысты жазба жариялап, оның полиция бөлімшесіне сұрақ-жауап алуға алып кеткеннен кейін мерт болғанын жазды. Артынша Маңғыстау облысының полициясы "Кенжебаевты полиция учаскесінде азаптап өлтірді" деген ақпаратты терістеді.

Жанболат Мамайдың жазбасындағы ақпаратқа қарағанда, 33 жастағы Ғалымжан Кенжебаевты белгісіз біреулер өткен аптада Жаңаөзенде аяусыз ұрып-соққан. Соның нәтижесінде Ғалымжан ауруханаға түсіп, басына операция жасалған. Бірақ жексенбі күні полицейлер "операциядан кейін толық айыға қоймаған Ғалымжанды сұрақ-жауап аламыз деп ауруханадан учаскеге алып кеткен". Біраз уақыттан соң оның мерт болғаны хабарланған.

"Операциядан кейін толық айыға қоймаған адамды не үшін полицияға алып кеткен? Ауруханадан әлі шықпаған пациентті дәрігерлер қалайша полицейлердің қолына тапсырған? Ғалымжан Кенжебаев полиция учаскесіне әкелінгеннен кейін біраз уақыттан соң қайтыс болған. Полиция тек сол кезде ғана жаңаөзендік белсендіге хабарласып, Базарбай Кенжебаевтың ұлы көшеде қайтыс болды деп айтқан (Олар Ғалымжанның ауруханаға түсіп, операция жасалғанын айтпаған – Ж.М)" делінген Мамай жазбасында.

Жанболат Мамай "өлім алдында аяусыз соққы алған Ғалымжанның денесінің суреттері бар екенін", бірақ адам шошырлық жағдай болғандықтан әлеуметтік желіге жарияламағанын жазады. Мамай "Ғалымжанды алып кеткен полиция қызметкерлері мен операциядан кейін пациентті алып кетуге рұқсат берген дәрігерлер үстінен қылмыстық іс қозғалуы тиіс" деп жазған. Бұл "Жаңаөзендегі азаптау куәгерлерінің көзін жоюдың амалы емес пе" деп сұрақ та қойған.

1 шілдеде түнде Маңғыстау облысының полициясы Ғалымжан Кенжебаевтың өліміне қатысты түсініктеме беріп, "оны полиция учаскесінде азаптады" деген ақпарат шындыққа сәйкес келмейді деп мәлімдеді.

Полицияның хабарлауынша, Ғалымжан Кенжебаев өткен аптада Жаңаөзенде "Самал" ықшамауданында біреулермен ішіп төбелесіп, жарақат алған. 27 маусымда Жаңаөзен ауруханасына барған кезде дәрігерлер оның басы, беті мен омыртқасы жарақаттанғанын анықтап, амбулаторлық жағдайда емделуге кеңес берген.

Медициналық қызметкерлер осы жағдай жөнінде полицияға хабарлаған.

"Бұдан соң төбелеске қатысушы екі жақтан түсініктеме алу үшін полиция басқармасына шақырылды. Денсаулыққа зақым келтіру фактісі бойынша Әкімшілік кодекстің 73-1 бабы бойынша әкімшілік құқықбұзушылық туралы хаттама толтырылды. Сұрақ-жауап алынғаннан кейін ер адамдар жеке-жеке үйлеріне жіберіліп, полиция басқармасының ғимаратынан шыққан. Сол күні кешкі сағат 21:30 шамасында "3 a" ықшамауданының тұрғынынан 102 қызметіне қоңырау түсіп, үйлердің бірінде ер адамның денесі табылғанын хабарлады" делінген полиция хабарламасында.

Полиция Ғалымжан Кенжебаев көз жұмған орыннан "ішімдік бөтелкелері де табылғанын" айтып отыр. Оқиғаға қатысты сотқа дейінгі тергеу амалдары басталған. Сот-медициналық сараптама тағайындалған. Сарапшының алдын ала қорытындысы бойынша, Ғалымжан Кенжебаев жүрек ауруынан қайтыс болуы мүмкін.

Ғалымжан Базарбаев 2011 жылы Жаңаөзен оқиғасы кезінде абақтыдағы соққыдан қаза тапқан Базарбай Кенжебаевтың ұлы. 9 жыл бұрын Базарбай Кенжебаевтың өліміне қатысты Жаңаөзен қаласының тергеу абақтысы бастығының міндетін атқарған Жеңісбек Теміров сотталған. Бірақ құқық қорғаушылар Теміровке азаптау емес, қызмет өкілетін асыра пайдалану бабымен айып тағылғанын сынаған. Жазасының белгілі бір бөлігін өтегеннен кейін Жеңісбек Теміров 2014 жылы түрмеден босатылған. Базарбай Кенжебаевтың өлімінен кейін бірнеше жылдан соң оның қызы Әсем Кенжебаева да ауыр науқастан қайтыс болған. Әсем полицияны "әкемді де, өзімді де азаптады" деп айыптаған болатын. Белсенділер Жаңаөзен оқиғасының шындығы әлі ашылмады деп санайды.

ПІКІРЛЕР

XS
SM
MD
LG