Тәжікстан денсаулық сақтау министрі Жамолиддин Абдуллозоданың суреттері министрліктің әлеуметтік желілеріндегі парақшаларында жарияланды. Екі апта бұрын оны президенттің туыстары ұрып кеткені хабарланды.
Денсаулық сақтау министрлігінің баспасөз қызметі 3 тамызда Жамолиддин Абдуллозоданың бірнеше суретін жариялап, министр азаматтарды қабылдады деп хабарлады. Суреттердің қашан түсірілгенін анықтау мүмкін болмай отыр.
20 шілдеде денсаулық сақтау министрін Тәжікстан президенті Эмомали Рахмонның үш немере інісі ұрған. Озоди радиосы дереккөзінің мәліметінше, Фахриддин, Фаррух және Зиёдали Сафаровтар дәрігерлер мен шенеуніктерге жұдырық ала жүгірген. Олардың арасында министр де болған. Үш жігіт анасы Курбонби Рахмонованың қазасын ауыр қабылдаған. Шетел мамандары тәжік дәрігерлері науқасты дұрыс емдемеген деген тұжырым жасаған.
Денсаулық сақтау министрлігінің өкілдері министрді соққыға жықты деген мәліметті терістеп, Абдуллозода жұмыс бабымен Ресейде жүр деп хабарлаған.
Сол кезде министрліктің мәліметіне көпшілік күмәнмен қараған, өйткені баспасөз қызметі министрдің шетелдегі сапары туралы ешқандай сурет жарияламаған.
Тәжікстанның құқық қорғау органдары оқиғаға байланысты қылмыстық іс қозғамаған, полицияның оқиғаны тексермегені де кейін мәлім болды.
54 жастағы Жамолиддин Абдуллозода былтыр мамырда коронавирус пандемиясы өршіп тұрған кезде министр қызметіне тағайындалған.
ПІКІРЛЕР