Семей қаласында 9 тамызда кешке Ертіс өзенінде орналасқан көпірдің бір жабын тақтасы мен таянышы құлады. Соған байланысты көпірдегі жол жабылды.
Семей әкімшілігі баспасөз қызметінің хабарлауынша, қала әкімінің орынбасары мен көлік бөлімінің өкілдері көпір "айтарлықтай зақымданбағанын анықтаған", бірақ "қауіпсіздік үшін жолды жабу туралы шешім қабылдаған". Ертіс өзені арқылы өтетін жалғыз автокөпір жабылған соң қалада көлік тығыны көбейген.
Әкімшілік 10 тамызда көпірді тексеру үшін мамандар шақыруды көздеп отыр.
Қала тұрғындары көпірдің жабын тақтасының құлағанына таңқалмайды: 1961 жылы салынған көпір 2013 жылы "апатты жағдайда" деп танылған.
2013 жылдан бері көпірге косметикалық жөндеу жұмыстары жүргізіліп келеді. Оған ондаған миллион теңге жұмсалды. Толықтай жөндеу жұмысы 16-31 миллиард теңге тұрады деп айтылған. Әкімшілік мұндай ақша жоқ деп отыр.
Семейдегі аспалы көпір де жөндеуге сұранып тұр. Оны жапондар салғандықтан, Жапониядан маман шақыртуға қала әкімшілігі қаражат таппаған. Семей әкімі Нұрымбет Сақтағанов 2024 жылы жаңа көпір салынады деп хабарлаған.
ПІКІРЛЕР